Pica

Shkolla e kuzhinës

200 Receta - - Antipasta -

Mielli, duhet të jetë miell për pica ose mund të përziejmë miell të bardhë 0 me miell “farro” (miell i ashpër), që pica të dalë më krokante. Fryrësi mund të jetë: maja birre e freskët, maja birre e thatë. Sasia e majasë ndryshon në bazë të stinës, temperaturës së ambientit dhe të kohës që ju keni në dispozicion. Majaja e birrës, në të dyja rastet duhet të tretet në ujë të vakët me pak mjaltë ose sheqer (aktivizon fryrjen e brumit). Nuk duhet ta teprojmë me sasinë e majasë, sepse ajo vërtet shkurton kohën e fryrjes, por si rezultat do të kemi një picë më të vështirë për t’u tretur dhe kjo e rëndon stomakun. Shpesh, kur nuk kam kohë, përdor fryrës të menjëhershëm “pane angeli”. Ky lloj fryrësi, (që e gjeni në të gjitha dyqanet Conad) bën që brumi i picës ose fokaçes, të mos ketë nevojë të fryhet paraprakisht. Me t’u përgatitur brumi, shtrohet në tavë dhe futet të piqet menjëherë në furrë. Do ta gjeni përdorimin e këtij fryrësi te receta e piadinës, te tortat e kripura, etj… “Fryrja e brumit” ose “ardhja e brumit”, që shoqërohet me dyfishimin e volumit të tij, duron rreth 2-3 orë. Nëse e keni me ngut dhe doni të shkurtoni kohën, futeni brumin në një tas të madh, mbulojeni me një pecetë të lagur dhe vëreni në furrë të cilën e keni ndezur më parë me 40° (tashmë e keni fikur) ose në furrë, duke lënë të ndezur vetëm dritën e furrës pa pasur nevojë ta ngrohni më parë. Mbushja e picës: Mozzarella dhe domatet më parë duhet të priten në kubikë, në mënyrë që të humbin lëngun, sepse gjatë pjekjes do të bëjnë që pica të ketë lagështi dhe të mos jetë krokante. Nëse do të përdorni salcë domatesh, vëreni më parë të marrë valë në zjarr me pak kripë dhe një majë luge sheqer (i heq aciditetin) që të bëhet më e trashë dhe të humbasë ujin e tepërt. Mozzarella do të hidhet mbi picë kur kanë mbetur vetëm 5 minuta nga pjekja e saj, duke e shtrydhur më parë me dorë, për të qenë të sigurt që ka humbur gjithë lëngun. Proshuta koto do të hidhet mbi picë kur mungojnë 5 minuta nga pjekja, ndërsa proshuta krudo dhe spek do të hidhen sipër kur pica të jetë pjekur.

Pjekja: është e rëndësishme temperatura e pjekjes, e cila nuk duhet të jetë shumë e ulët sepse lagështia e përbërësve nuk arrin të avullojë dhe pica do të mbetet e qullët. Temperatura më e mirë është 250° për 15-20 minuta afërsisht. Koha varet edhe nga furra.

Më pëlqen shumë pica, do ta haja me kënaqësi çdo ditë, po të mundesha… personalisht më pëlqen ta gatuaj në shtëpi. Për të pasur një rezultat optimal, është e rëndësishme të kemi parasysh disa sugjerime që lindin nga provat dhe gabimet që bëja unë derisa gjeta brumin që më pëlqen më shumë.

Newspapers in Albanian

Newspapers from Albania

© PressReader. All rights reserved.