Disa rregulla për të gatuar një rizoto të mirë

200 Receta - - Pjata Të Para -

Për të pasur rezultat maksimal në përgatitjen e orizit ose të supave me oriz, është e rëndësishme të përdoret lloji i duhur i tij.

Klasifikimi i orizit në bazë të recetave: Gjysmë i zierë – sallatë Originiario – për supë Carnaroli, Arborio – për rizoto dhe torta orizi

Rregullat që duhet të keni parasysh për përgatitjen e orizit:

Yndyra hidhet në fillim dhe në fund të përgatitjes së tij. Gjalpi është ideal, por sot përdoret bashkë me vajin e ullirit, sidomos kur gatuhet së bashku me zarzavatet ose me peshk.

Zakonisht përdoret qepa, por mund të zëvendësohet me hudhër ose presh, ose edhe me vaj të aromatizuar i cili shtohet në fund.

“Shuarja me verë” nënkupton verën e bardhë që i hidhet orizit të saposkuqur, zakonisht për t’i shtuar shijen, por nuk është e detyrueshme.

Lëngu i mishit ose i zarzavateve janë të rëndësishëm për rizoton. Gjithnjë është më mirë nëse ai përgatitet në shtëpi, por në rastin kur e gatuajmë me djathë dhe ky i fundit i jep shumë “karakter” orizit, mund të përdorim edhe vetëm ujë të valuar. Nëse dëshironi diçka më “chic”, në vend të lëngut, mund të përdorni shampanjë ose verë të mirë, por këto të fundit duhet të jenë në temperaturë ambienti. Skuqja e orizit me yndyrë është e rëndësishme sepse jo vetëm që i jep shije rizotos, por edhe ndihmon që të mos bëhet si qull. Zierja: Zakonisht, lëngu i valuar shtohet herë pas here sipas nevojës, pasi e ka thithur lëngun e hedhur më parë. Duhet përzierë në mënyrë që orizi të lëshojë niseshtenë e tij, sepse kështu rizoto bëhet më kremoz. Koha e zierjes së tij është e ndryshme për lloje dhe marka të ndryshme. Ndiqni gjithmonë kohën e zierjes që shkruhet në ambalazhin e tij. “Mantekatura” nuk është gjë tjetër veçse gjalpi dhe Parmigiano që i hedhim orizit pasi ka mbaruar zierjen. Gjalpi dhe Parmigiano hidhen bashkë dhe përzihen me shpejtësi. Kjo bën që orizi të lëshojë niseshtenë që kanë kokrrat e tij dhe rizoto të bëhet më kremoz. Teorikisht, llogaritet 80-100g oriz për person. Lëngu: zakonisht është dyfishi i masës së orizit. Për 4 persona përdoret 1 kokërr qepë e vogël dhe 1 gotë verë

Çfarë duhet të kemi parasysh në gatimin e makaronave:

Teorikisht, llogariten 80g makarona për person, por nëse nuk ka pjatë të dytë, është mirë që sasia e tyre të shtohet. Duhet pasur parasysh edhe salca me të cilën do të shërbehet dhe fakti që makaronat e shkurtra shtojnë më pak se spagetit gjatë zierjes. Në një tenxhere të madhe hedhim 1 litër ujë për çdo 100g makarona dhe vetëm kur uji të valojë, shtojmë kripën (10g për çdo litër ujë) dhe më pas makaronat. Koha e zierjes së tyre ndryshon në varësi të markës dhe formatit të tyre. Duhet të ziejnë në tenxhere pa kapak dhe të përzihen vazhdimisht. Nëse i keni zierë më shumë, ftohini menjëherë me ujë rubineti që ato të mos zbuten më shumë.

Për pastiço:

Kur gatuajmë një pastiço, duhet të kemi parasysh që të ruajmë pak nga uji ku ziejmë makaronat, pasi mund të nevojitet për të holluar salcën që do të përdorim në rastin kur ajo është e thatë. Tava duhet lyer mirë me gjalpë dhe me Parmigiano të grirë, në mënyrë që të piqet mirë dhe të bëhet sa më krokante.

Recetat e orizit, ashtu si dhe makaronat, përgatiten në moment. Zakonisht, nuk duhen më shumë se 30 minuta për përgatitjen e tij.

Newspapers in Albanian

Newspapers from Albania

© PressReader. All rights reserved.