"Nuk largohem nga zyra pa bërë Rrugën e Arbrit"
Rama në Dibër: Dikush më përshëndeti me dy gishta, na mbështet "Shukriu mendoi për punët e veta, jo të qytetarëve"
Kryeministri Edi Rama prezantoi dje, kandidatin e majtë për Bashkinë e Dibrës, Muharrem Rama. Kryeministri deklaroi se "në këtë garë jemi më shumë dhe përveç PS, LSI, PDIU; edhe demokratët po mbështesin Ramën e duhur për Dibrën". Kryeministri deklaroi se ka premtuar ndërtimin e rrugës së Dibrës dhe se nuk largohet nga Kryeministria pa bërë këtë rrugë. "Kemi dëgjuar se do të ishim më pak, por në këtë garë jemi më shumë. Kur hyra, u ndjeva shumë i emocionuar nga mikpritja e jashtëzakonshme. Këtu nuk është vetëm PS, LSI, PDIU, por edhe demokratët po mbështesin Ramën e duhur për Dibrën. Ftoj të gjithë mbështetësit e PD- së, që mes një burri të mirë por të lodhur dhe që duhet të dalë në pension, dhe mes Muharrem Ramës, të zgjedhin Ramën. Dibra nuk është vendi që kërkon një person që do të dalë në pension. Ditën që do të lodhem me problemet, do marr rrugën për në shtëpi. Rruga e Arbrit është premtuar që 25 vite. Unë e kam premtuar, por nuk mund të thoni që nuk e kam bërë. Do bëj gjërat që dëshirojnë partnerët e koalicionit. Nuk largohem nga Kryeministria pa bërë Rrugën e Arbrit. Kemi negociuar 3 vite rresht me Kinën një kontratë të arsyeshme, rruga do të bëhet realitet. Në fillim të punës sonë ishte e pamundur, pasi në vend të investimeve duhej të merreshim me malin e borxheve që na kishin lënë. Në 2013- ën gjetëm një vend të kërcënuar nga kolapsi financiar nga situata e borxheve. Kemi shlyer aq borxhe sa do të bënin një rrugë 3 herë më të gjatë se Rruga e Arbrit", - deklaroi kryeministri Rama. Ai njoftoi se prej kohësh është lidhur marrëveshja me qeverinë kineze. Ai shtoi se, së pari, qeveria duhej të merrej me malin e borxhit që kishte lënë qeveria e kaluar. Nga ana tjetër, kryeministri theksoi se Dibra kishte një kryetar bashkie që nuk donte t'ia dinte për qytetarët, por vetëm për punët e veta, duke ' thumbuar' kështu ish- kryetarin Shukri Xhelili. Teksa u ndal te kandidati i djathtë, Sherefedin Shehu, Rama e cilësoi atë ' një burrë të mirë dhe të lodhur që është momenti të dalë në pension'. Rama nuk la pa ngazëllyer me të qeshura të pranishmit teksa u shpreh se "dikush më përshëndeti me dy gishta, çfarë do thotë se po na mbështet". Gjatë prezantimit të kandidatit të PS- së për Bashkinë ë Dibrës, ministrja e Arsimit, Lindita Nikolla u është përgjigjur akuzave të Partisë Demokratike se po kërcënon për heqje nga puna 300 mësues, për të votuar pro të majtës. Ministrja ka hedhur poshtë akuzat e PD- së, duke i cilësuar ato shpifje. Nikolla deklaroi se koha e kërcënimeve ka ikur. "Rama nuk do të arrijë të bëjë asnjë kilometër rrugë siç nuk ka bërë as edhe një në 40 muaj. Së pari, sepse nuk ka prioritet qytetarët, zhvillimin e vendit. Paratë për vete e për miqtë, janë e vetmja formë e qeverisjes së tij. Së dyti, sepse koha e Ramës ka mbaruar. Ka vjedhur, poshtëruar, varfëruar, sunduar shqiptarët e dibranët që ditën e parë, e tani ka ardhur fundi."