Banorët përplasen me policinë, kundërshtojnë punimet te parku: Shpronësimet janë qesharake
Bashkia: Nuk do dëmshpërblehen, s'kanë certifikatë pronësie
FIER - Pronarë të tokës pranë ish- fabrikës së miellit në lagjen "Apollonia" në qytetin e Fierit, kanë kundërshtuar dje rinisjen e punimeve për ndërtimin e parkut qendror të qytetit. Ata janë konfrontuar në disa momente edhe me forcat e policisë. Pronarët kanë deklaruar se janë kundër shpronësimeve që po u bëhen, pasi çmimet e qeverisë janë mjaft të ulëta, madje qesharake, dhe për këtë arsye refuzojnë ndërhyrjet në tokën e tyre. Ata u shprehën se certifikatën e tokës e kanë marrë nga Zyra Vendore e Regjistrimit të Pasurive të Paluajtshme. Gjatë konfrontimit me policinë, njëri prej banorëve pretendoi se familjari i tyre, Veledin Xhafa është dhunuar nga policia bashkiake dhe është dërguar në spitalin e Fierit për të marrë ndihmën e parë. Ndërkohë, të interesuar pranë Bashkisë Fier, drejtoresha e Përgjithshme e Legjislacionit, Esmeralda Kapllanaj, pohoi se pjesëtarë të familjes Xhafa nuk disponojnë certifikatë pronësie, dhe si rrjedhim nuk do të dëmshpërblehen. Toka në të cilën po punohet aktualisht për ndërtimin e parkut qendror të qytetit të Fierit, zë një sipërfaqe prej 1.627 metrash katrorë, ndërsa bëhet fjalë për 5 pronarë, të cilët e kundërshtojnë dëmshpërblimin për këtë tokë.