Kosovë, shpërthim me granatë pranë "RTK", "Rugovasit" marrin përsipër sulmin
Në momentin e sulmit, gazetarë të pranishëm, qeveria dënon aktin Sulmuesit: Media është rreshtuar krah qeverisë
Një granatë dore ka shpërthyer në orët e vona të hënën në mbrëmje në oborrin e Radio Televizionit të Kosovës. Sipas mediave në Kosovë, shpërthimi ka ndodhur saktësisht te transmetuesi i valëve të "RTK"- së. Mësohet se në momentin e shpërthimit në godinën e "RTK"së ka pasur gazetarë dhe punonjës të tjerë të stafit, të cilët janë tronditur nga shpërthimi i fuqishëm, por fatmirësisht nuk ka pasur të lënduar. Policia e Kosovës ka rrethuar menjëherë objektin e televizionit dhe ka ekzaminuar provat në vendngjarje. Sulmi është marrë përsipër nga grupi "Rugovasit". Në një njoftim, ata kanë bërë të ditur se "RTK"- në e kanë sulmuar me arsyetimin se është rreshtuar krah qeverisë. "Rugovasit" kanë paralajmëruar sulme më të ashpra kundrejt qeverisë. Njëkohësisht, ata u kanë bërë thirrje gazetarëve ta mbrojnë Kosovën duke raportuar realitetin. Është pikërisht ky grupim që është bërë i njohur së fundmi për granatën që hodhi pak ditë më parë në ndërtesën e Kuvendit të Kosovës. Qever- ia e Kosovës ka dënuar ashpër ngjarjen, duke e cilësuar sulm ndaj fjalës së lirë. Presidenti i vendit, Hashim Thaçi, duke dënuar sulmin, ka ftuar të gjithë politikanët që të ndalojnë diskursin e tyre linçues ndaj mediave. Kryeparlamentari i Kosovës, Kadri Vesili është shprehur se hedhja e mjetit shpërthyes mbi Radio Televizionin e Kosovës, përbën një veprim kriminal. Edhe Lëvizja Vetëvendosje dhe Aleanca për Ardhmërinë e Kosovës e kanë dënuar këtë sulm. Këshilli për Mbrojtjen e të Drejtave e të Lirive të Njeriut e quajti një presion mbi transmetuesin publik. "RTK"ja po përballet me vështirësi të mëdha materiale, ku po rrezikohen edhe pagat e të punësuarve. Instituti i Medias së Kosovës dënon ashpër sulmin e së hënës ndaj televizionit publik të Kosovës, "RTK". "Sulmet e tilla janë të papranueshme dhe si të tilla nuk ndihmojnë shoqërinë, përkundrazi. Mediat duhet të jenë në gjendje të punojnë lirshëm dhe në mënyrë të sigurt për ta kryer misionin që kanë", thuhet në reagimin e IMK- së. "Industria mediale në Kosovë duhet të
ndihmohet të kryejë punën dhe jo të sulmohen në misionin e tyre, sepse kjo pengon lirinë e shprehjes. U bëjmë apel organeve të drejtësisë
që të ndërmarrin masa ligjore që autorët e dhunës të identifikohen dhe të dalin para drejtësisë", thuhet në fund të reagimit.