Flakët përpijnë malin e Shëngjinit, rrezikohen resortet turistike
Prefekti i Lezhës: Po vijnë helikopterë nga Italia. Kapet i dyshuari për zjarrvënie Evakuohen dhjetëra banorë, ndërhyjnë forcat e ushtrisë
Një zjarr masiv ka përf shirë që prej dy ditësh malin e Shëngjinit, duke shkaktuar panik te banorët dhe pushuesit. Ndërsa, ditën e djeshme janë shfaqur dy vatra të reja zjarri në zonën e njohur si "Rana e Hedhun". Mësohet se flakët janë përhapur me shpejtësi si pasojë e erës së fortë, duke bërë që situata të dalë jashtë kontrollit, pasi zona e banuar ndodhet vetëm 2- 3 km larg. Po ashtu, bëhet e ditur se në zonën ku ka rënë zjarri janë dëgjuar shpërthime, ndërsa sipas banorëve mendohet se këto janë municione, pasi sipas tyre aty dikur ka qenë një poligon qitjeje. Dhjetëra forca zjarrfikëse si dhe ato të ushtrisë ndodhen në vendin e ngjarjes dhe po bëjnë të pamundurën për shuarjen e vatrave të zjarrit. Ndërkaq, Shemsi Prençi, drejtori i Përgjithshëm i Emergjencave Civile tha se flakët e zjarrit po përhapen me shpejtësi dhe se për parandalimin e një katastrofe 2 helikopterë monitorojnë nga ajri dhe hedhin ujë nga lart, ndërsa kërkohen mjete të kapaciteteve më të mëdha. Nga ana tjetër, prefekti i Lezhës, Eduard Ndreca tha se për të ndihmuar në shuarjen e flakëve do të vijnë edhe helikopterë nga Italia. Sipas Ndrecës, situata është e ndërlikuar, por pushuesit dhe qytetarët janë të sigurt. Burime nga vendorët pohuan se zjarrfikëset e Bashkisë së Lezhës, portit të Shëngjinit dhe ato të ushtrisë janë vendosur përgjatë rrugës drejt "Ranës së Hedhun" për të pen- guar flakët që të drejtohen drejt resorteve turistike. 100 ushtarë, dhjetëra forca policie dhe zjarrfikës ndodhen në vendngjarje që prej natës të së mërkurës. Po të njëjtat burime u shprehën se janë evakuuar dhjetëra banorë dhe se fatmirësisht nuk ka viktima. Sakaq, dyshohet që zjarri të jetë i qëllimshëm. Policia e Lezhës ka arrestuar një 63vjeçar si autor të dyshuar të zjarrvënies në malin e Shëngjinit. Bëhet fjalë për shtetasin Preng Përgjoni, banues në Lezhë. Sipas bluve, Përgjoni ka pasur si qëllim ripërtëritjen e kullotave që të kulloste bagëtitë që mban në një stan në malin e Shëngjinit. Materialet në ngarkim të tij i janë përcjellë për hetime të mëtejshme prokurorisë së Lezhës për veprën penale "Shkatërrimi me zjarr i pyjeve dhe i mjedisit pyjor".