Urdhri i Fagut: Sot në punë, duhet të mbyllim planin
Edhe pse dita e sotme u shpall ditë pushimi për punonjësit e administratës me vendim të Kryeministrit Rama, punonjësit e Doganave janë urdhëruar të dalin në punë. Drejtoresha e Përgjithshme e Doganave, Pranvera Fagu, nëpërmjet një urdhri të shpërndarë ditën e premte, ka njoftuar punonjësit e administratës doganore që më 25 korrik të paraqiten në punë. Në urdhrin e lëshuar shpjegohet se punonjësit e administratës duhet të paraqiten në punë për të mbyllur planin e realizimit të të ardhurave. Burime nga Drejtoria e Përgjithshme e Doganave thanë për gazetën se punonjësve u është komunikuar urdhri nëpërmjet postës elektronike të shpërndarë nga Drejtoria e Burimeve Njerëzore në Drejtorinë e Doganave. "Në kuadër të realizimit të objektivave të muajit korrik, meqenëse jemi në ditët e fundit të muajit, që përkon me mbyll- jen e planit dhe duke konsideruar se brenda këtij afati janë 4 ditë të shtuna dhe të diela, dita e hënë, 25 korrik, është ditë e rregullt pune", thuhet në urdhrin e Burimeve Njerëzore. Kryeministri Rama e shpalli 25 korrikun ditë pushimi, për shkak të miratimit të Reformës në Drejtësi më 22 korrik nga Parlamenti. "Në mbështetje të neneve 95, pika 2 dhe 100 të Kushtetutës, me propozimin e Kryeministrit, Këshilli i Ministrave vendosi: Caktimin e ditës së hënë, datë 25 korrik 2016, ditë pushimi për punonjësit e administratës shtetërore. Ngarkohen institucionet e administratës shtetërore për zbatimin e këtij vendimi", thuhet në vendimin e Kryeministrit Rama të botuar në fletoren zyrtare. Ditën e sotme në punë do të jenë edhe deputetët dhe punonjësit e administratës së Kuvendit, për shkak të mbajtjes së seancës së fundit plenare për këtë sesion.