Pajtim Aga, në çështjen e dibranëve të zhdukur
LEZHE - Vëllai i komisarit të Policisë së Dibrës, i arrestuar të dielën në Lezhë me kokainë, është i përfshirë në çështjen e zhdukjes së 32 dibranëve në det. Pajtim Aga u ndalua, pasi në makinën e tij u gjet një sasi prej 320 gramësh kokainë, ndërsa po udhëtonte nga Dibra në drejtim të Kurbinit. Aktualisht, çështja e tij është në hetim nga ana e zyrës së Antitrafikut, pasi dyshohet për bashkëpunim me persona të tjerë në furnizimin me drogën e shtrenjtë. Vetë Aga mësohet të ketë mohuar që të ketë gisht në këtë çështje, duke e konsideruar si kurth që ia kanë ngritur për ta vënë në pranga. Ai është vëllai i shefit të Policisë së Dibrës, Robert Aga, i cili nuk pasur asnjë reagim për rastin. Ndërkohë, emri i Pajtim Agës, 47 vjeç, rezulton si person i përfshirë në rastin e largimit të 32 dibranëve nga vendi i tyre për në Perëndim, por në mars të vitit 1996 ata u zhdukën pa asnjë gjurmë. Pajtim Aga, bashkë me një person tjetër, ndërhynë për të çuar klandestinët deri në Vlorë, në mënyrë që të kalonin me skaf drejt Italisë. Por prej ditës së nisjes, nuk ka asnjë lajm prej tyre. Aga u ka treguar familjarëve të të zhdukurve se kishte dyshime që ata të ishin kapur dhe të ishin burgosur në Korfuz, por prej 20 vitesh nuk ka asnjë sinjal.