“Kanalizimet e Ksamilit mbyllen në nëntor”

Punimet për rrjetin e kanalizimeve në qytetin turistik të Ksamilit do të përfundojnë brenda muajit nëntor. Deklarata u bë nga ministri i Transporteve, Sokol Dervishaj, dje gjatë inspektimeve të punimeve në Ksamil, i cili tha se ky projekt është në fazën përfundimtare. Dervishaj nënvizoi se kjo vepër do të sjellë një impakt shumë pozitiv për këtë zonë turistike të vendit, pasi do të shërbejë edhe gjatë sezonit të fluksit turistik. “Ky projekt që financohet nga fondet ‘ IPA’, do t’u shërbejë rreth 4 mijë banorëve rezidentë në Ksamil, por ka një kapacitet përpunimi për 40 mijë banorë, gjatë sezonit turistik”, tha Dervishaj. Ministri Dervishaj u ndal edhe te problematika e pak javëve më parë, duke theksuar se janë marrë masat që të mos ketë ndotje të bregdetit dhe të ruhen standardet ambientale. Rrjeti i kanalizimeve të Ksamilit do të lidhet me impiantin e Sarandës dhe pritet të sjellë përmirësim rrënjësor të sistemit të kanalizimeve në zonën turistike.