Denoncimi i Ramadanit: Më kërcënoi drejtoresha
Agron Ramadani, ish- punonjës i Drejtorisë së Tatimeve në Shkodër, është shprehur në ato ditë se ka marrë presione e kërcënime nga vetë drejtori Hysaj dhe ish- drejtoresha e Përgjithshme, Briseida Shehaj, duke kërkuar mbrojtje nga shteti. Në një dëshmi të dhënë në qershor të këtij viti, Ramadani ka rrëfyer që nga momenti i parë kur nuk firmosi rimbursimin e deri te largimi i tij nga puna, kërcënimet, e më pas padia penale që ka bërë për shkak të rimbursimit të dhënë në mënyrë të jashtëligjshme, sipas tij. “Jam larguar nga puna më 20 mars 2015 me motivacionin ‘ moszbatim urdhri’. Në momentin e largimit nga shërbimi civil isha drejtor i Drejtorisë së Vlerësimit të të Ardhurave dhe Kontabilitetit. Më përpara kam mbajtur edhe poste të tjera në atë drejtori. Jam larguar nga puna sepse kam kundërshtuar firmosjen e urdhërpagesës për rimbursimin e pamerituar të subjektit ‘ Halaj shpk’. Për këtë rimbursim aspak të ligjshëm, kam vënë në dijeni që më 2 maj 2014 drejtorin rajonal, Hysen Hysaj, pasi kontrolli kishte miratuar një vlerë rimbursimi të paverifikuar dhe kam pritur reagimin e tij. Kam vënë në dijeni edhe drejtoren e Përgjithshme të Tatimeve, Briselda Shehaj. Pasi kam vënë në dijeni drejtoren e Përgjithshme të Tatimeve në lidhje me dyshimet e mia për këtë rimbursim të paligjshëm dhe të tjera veprime antiligjore të drejtorit rajonal, kanë filluar edhe procedurat disiplinore ndaj meje për largimin tim me çdo kusht nga puna”, tha Ramadani. Sipas tij, Shehaj më 30 dhjetor 2014 e ka kërcënuar drejtpërdrejt me largim nga puna, nëse nuk firmoste urdhrin. “Në këto rrethana shtrënguese pranova si alternativë largimin tim nga puna, vetëm e vetëm për të mos u bërë ortak në një dhe më shumë krime të tjera të paralajmëruara, me dëm ekonomik për shtetin”.