Hetim në Kosovë për Flamur Nokën

TIRANE – Javën e kaluar, sektori i dekriminalizimit në Prokurorinë e pPërgjithshme ka nisur hetimet ndaj deputetit demokrat Flamur Noka. Në kuadër të hetimit në fjalë, organi i Akuzës ka nisur një letërporosi për ndihmë juridike në Kosovë, ku kërkon informacion nëse Flamur Noka është ndaluar, shoqëruar apo arrestuar ndonjëherë në këtë shtet. Prokuroria është vënë në lëvizje për këtë rast nga informacionet e publikuara disa ditë radhazi në media, por edhe nga një kërkesë e bërë zyrtarisht prej një grupi deputetësh të Partisë Socialiste. Objekti i hetimit ndaj Flamur Nokës, sipas Prokurorisë, është formulari i dekriminalizimit, në të cilin nuk është shënuar asnjë informacion në lidhje me një ndalim nga policia në vitin 1991. Sipas informacioneve mediatike, por edhe sipas kërkesës së grupit të deputetëve të PS-së, Flamur Noka është ndaluar në Prizren, në vitin 1991, nga Policia e ish- Jugosllavisë. Për shkak se ky precedent nuk është pasqyruar në formularin e dekriminalizimit nga ana e deputetit Flamur Noka, Prokuroria ka nisur hetimet. Dyshohet se pas ndalimit në Kosovë, Noka është pyetur në kohën e ngjarjes edhe në policinë e Kukësit në lidhje me arsyen e shoqërimit në Prizren nga Policia jugosllave.