Kukan: Bojkoti nuk e ndihmon opozitën

Eurodeputeti i djathtë, Eduard Kukan, është kundër vendimit të opozitës për të bojkotuar parlamentin. Përmes një reagimi në “Twitter”, Kukan ka sqaruar se opozita shqiptare ka ende shumë punë për të bërë para zgjedhjeve parlamentare në Kuvendin e Shqipërisë. “Bojkoti nuk e ndihmon atë t’i mbarojë këto punë”, shkruan në profilin e tij Kukan. Apeli i eurodeputetit vjen në një kohë që opozita është futur në ditën e pestë të protestës së saj, nga e cila ka deklaruar se nuk ka ndërmend të tërhiqet nëse në zgjedhje nuk do të shkohet me një qeveri teknike. Qëndrimi kundër vendimmarrjes së opozitës për bojkot i Kukan vjen pas deklaratave të raporterit për Shqipërinë, Knut Fleckenstein, lidhur me këtë çështje. Kreu i opozitës ka deklaruar se nuk ka ndërmend të tërhiqet nga vendimmarrja, që sipas tij ia imponuan shqiptarët.