Gramsh, soba e lënë ndezur djeg 6 banesa
GRAMSH - Një zjarr i përmasave të mëdha ka shkrumbuar gjashtë banesa të katit të tretë të një pallati në lagjen “Xhile Liçi” në Gramsh. Si pasojë, banorët janë gjendur në qiell të hapur, pasi apartamentet e tyre tashmë janë djegur dhe janë bërë të pabanueshme. Policia bën me dije se shkak i zjarrit ka qenë një sobë zjarri e ndezur në një nga apartamentet e katit të fundit të pallatit me tri kate dhe pas kësaj, flakët janë përhapur me shumë shpejtësi duke shkrumbuar edhe pesë banesat e tjera të katit. Efektivat e Zjarrfikëses, së bashku me Policinë, kanë mundur që të nxjerrin nga banesa të moshuarën me iniciale R. D., 75 vjeçe, e cila për shkak të gjendjes së rëndë shëndetësore nuk ka mundur të dalë në kohë nga banesa e saj. “Gjithçka është shkrumbuar. Ishte një jetë punë për të kompletuar banesën, dhe tash- më as që nuk kemi mundësi t’ia nisim nga e para, që nga luga dhe piruni, që janë karbonizuar”, thotë një nga banorët që iu dogj apartamenti. Luljeta Dollani, kryetarja e Bashkisë së Gramshit, ka zhvilluar një takim me specialistë të bashkisë, si dhe emergjencave civile, të cilët kanë nisur verifikimin e dëmeve në banesa, si edhe plotësimin e formularëve nga banorët, ndërsa ka premtuar se do të gjendet një zgjidhje. m. s.