Policia: Protesta ishte e paligjshme, kush do procedohet
Policia e Shtetit lajmëroi që, pavarësisht se protesta ishte paqësore dhe pa incidente, konsiderohet e paligjshme e për rrjedhojë organizatorët e saj do të procedohen penalisht. Për këtë arsye janë referuar materialet në Prokurorinë e Tiranës, Kurbinit, Elbasanit e Lushnjës për disa deputetë dhe funksionarë të Partisë Demokratike. Akuzat e ngritura ndaj tyre janë: “organizim dhe pjesëmarrje në grumbullime e manifestime të paligjshme” dhe “pengim i qarkullimit të mjeteve të transportit”. Policia theksoi dje se, për rreth 1 orë, tri pika kyçe në akset kryesore kombëtare rrugore dhe 2 nyje lidhëse në Tiranë u bllokuan nga protesta e PD- së, megjithëse Policia e Shtetit në zbatim të kërkesave të ligjit nuk miratoi lejen për mbajtjen e këtyre tubimeve. “Pretendimi i organizatorëve të kësaj veprimtarie të paligjshme, se ata thjesht e lajmërojnë Policinë dhe e bëjnë tubimin edhe aty ku kërcënohet siguria e qytetarëve apo pengohet seriozisht qarkullimi i njerëzve e mallrave, është i papranueshëm ligjërisht. Policia e Shtetit, me gjithë rezistencën e disa prej organizatorëve të mitingjeve të paligjshme, mundi me sukses të devijojë qarkullimin e mjeteve në disa akse dytësore dhe rrugë paralele, për të lehtësuar brenda mundësive të kufizuara trafikun e rënduar dhe bllokimin e qytetarëve. Gjithashtu u morën masa për mbajtjen hapur të korsive të emergjencës për ambulancat, që transportuan gjatë këtij harku kohor disa qytetarë në nevojë, duke garantuar ndihmën e nevojshme mjekësore në kohë dhe shmangur pasojat për jetën e shëndetin e njerëzve”, tha dje Policia. Ndërsa nënvizoi se nuk do të tolerojë askënd që i bie ndesh ligjit.