Tropojani i vrarë, dyshime për konflikte të 40- vjeçarit
Policia: S'ishte hasmëri e as precedentë, jetonte në varfëri
Tropojani i ekzekutuar me 4 plumba në sy të gruas në Vlorë nuk kishte asnjë problem hasmërie dhe as precedentë në vendlindjen e tij.
Kjo e dhënë është konfirmuar për Policinë e Vlorës nga kolegët e tyre të Tropojës, të cilëve u është kërkuar informacion në lidhje me viktimën Fatjon Sinani. Fillimisht u dyshua se vrasja e 40- vjeçarit mund të kishte lidhje me ndonjë hasmëri të mundshme në vendlindjen e tij, por burime nga grupi i hetimit bënë të ditur se u është konfirmuar se i ndjeri nuk ka pasur probleme të kësaj natyre dhe as me ligjin. Kjo e ka vështirësuar punën e policisë për të zbardhur motivin e krimit të rëndë që ndodhi në banesën e marrë me qira të Sinanit. Paraprakisht dyshohet se Sinani mund të jetë qëlluar me armë zjarri për shkak të ndonjë konflikti të kohëve të fundit në Vlorë. Ai punonte kryesisht në ndërtim, punë të cilën e siguronte duke dalë në sheshin "Omonia" në Vlorë. Ishte shpërngulur nga Tropoja para pesë vitesh, pasi ishte martuar me një vlonjate, ndërsa mësohet se nuk kishin fëmijë. E shoqja punonte në një ndërmarrje fason dhe kushtet e tyre ekonomike ishin mjaft të pakta. Për këtë shkak, policia nuk ka ende një pistë në lidhje me motivin e krimit. Bashkëshortja e tij është marrë në pyetje pas krimit në mënyrë sipërfaqësore ku ajo ka dhënë vetëm disa detaje dhe përshkrim të autorëve, pasi sipas Policisë, nuk ka qenë në gjendje psikologjike të japë shpjegime të tjera dhe dyshime të mundshme të saj në lidhje me krimin. Ndërkaq, Policia e Vlorës arriti të arrestojë në një kohë mjaft të shpejtë njërin prej autorëve të dyshuar, shtetasin Neritan Qejvani, nga Fieri. Sipas burimeve nga gru- pi i hetimit, 42- vjeçari nuk e ka pranuar autorësinë e krimit e kësisoj as të bashkëpunojë me Policinë. Mësohet se Qejvani është person me precedentë të mëparshëm penalë dhe ka qenë i dënuar në Greqi për lëndë narkotike. Në vendin e ngjarjes Policia gjeti edhe armën e krimit, një pis- toletë të llojit "Bereta". Blutë janë duke punuar për identifikimin dhe kapjen e një tjetër personi, i cili ka qenë pjesëmarrës në krim. Banorët u shprehën se nuk janë në dijeni se familja Sinani kishte probleme dhe se burrë e grua jetonin në kushte të vështira ekonomike.