Kapet autori i 7 grabitjeve
SHKODËR - Jetëgjatësia e dy grabitësve në Shkodër nuk ka zgjatur më shumë se 5 muaj, pasi kanë arritur që të arrestohen nga forcat e policisë. Në 5 muaj me radhë, shkurt- qershor, Klodian Sinaj dhe O. M. kanë arritur që të bëjnë 7 grabitje të ndryshme në Shkodër, duke arritur që t'u shpëtojnë gjurmëve të policisë. Rasti i fundit i vjedhjes te Rruga e Jezuitëve i ka "tradhtuar" sepse kamerat e sigurisë kanë bërë të mundur identifikimin e Klodian Sinajt, 28 vjeç, banues në Shkodër, i dënuar më parë për veprat penale "Vjedhje" dhe "Armëmbajtje pa leje". Në kërkim si bashkëpunëtor është shpallur O. M., 28 vjeç. Në këtë mënyrë, Policia ka finalizuar me sukses operacionin "Missing Gift". Policia bën me dije përmes komunikatës për shtyp se ka dokumentuar me prova ligjore autorësinë e 7 vjedhjeve me dhunë në Shkodër. Policia shton se përveç arrestimit në flagrancë të një shtetasi dhe shpalljen në kërkim të O. M., janë shpallur në kërkim edhe 2 shtetas të tjerë dhe po punohet për kapjen e tyre.