Gentiana Sula, në gjurmët e biologes

Aktiviteti që zhvillon sot AIDSSH, së bashku me Fakultetin e Shkencave, nuk është thjesht një detyrë institucionale. Përtej zyrtares, duket se ka edhe një grishje të hershme personale. Ndërsa e shohin aq të zellshme në çështjet e dosjeve të ish- Sigurimit dhe të grumbullimit të çdo të dhëne që do të ndihmonte në zbardhjen e së shkuarës së përbashkët apo asaj individuale, shumë pak mund ta dinë se drejtoresha e AIDSH- së, Gentiana Sula, është po ashtu një biologe, madje një nga ato ish- studentet e Fakultetit të Shkencave, që ka përfunduar studimet me medalje ari. "Nuk mund ta fsheh se interesi im ndaj figurës së Sabiha Kasimatit është i hershëm, që në kohët kur isha studente dhe studioja në Fakultetin e Shkencave. Gjithmonë kam dashur të di më shumë rreth biologes së parë shqiptare, rreth kësaj shkencëtareje, së cilës iu pre puna në mes. Dhe tani kam fatin, nga një tjetër pozitë, të përmbush jo vetëm detyrimet ligjore, për të ndihmuar të afërmit e saj në zbardhjen e së vërtetës rreth kësaj figure: si u shënjestrua, si u ndoq, si u dënua. Por, në njëfarë mënyre, të vë në vend nderin që ajo meriton si një intelektuale dhe shkencëtare. Ndaj edhe jam impenjuar personalisht në plotësimin e dosjes së saj, por edhe për ardhjen në Shqipëri të diplomës së saj italiane", thotë Sula.