Trajneri i Dinamos, Khaskeviç: Skënderbeu donte rezultat
Trajneri i Dinamos së Kievit, Aleksandar Khaskeviç, nuk pranoi t'u tregonte gazetarëve pas ndeshjes se çfarë u kishte thënë lojtarëve në pushim. "Më mirë të mos e dini se çfarë u thashë", u shpreh trajneri mes të qeshurave në sallën e konferencave, ku gjithsesi pranoi se pjesa e dytë kishte dhuruar një tablo krejtësisht ndryshe nga e para. "I bëmë një fillim të fortë ndeshjes në pjesën e dytë. Moraesh hyri në fushë dhe pas golit të dytë ishim në kontroll të plotë të takimit. Gjëja më e rëndësishme për ne është që fituam ndeshjen e hapjes në fazën në grupeve", shpjegoi trajneri. "Ishin vetëm 45 minuta dhe ne po mundeshim, gjithçka mund të ndodhte. Për më tepër, në pjesën e parë kundërshtari po na rrezikonte me kundërsulme. Ndoshta edhe kishte disa raste të rrezikshme para portës sonë, por këto gjuajtje nga afër apo nga larg na treguan vendosmërinë e kundërshtarit për të arritur një rezultat. Nuk ka emra të mëdhenj në këtë grup, por të gjithë janë rivalë të një niveli shumë të lartë", tha Khaskeviç.