Tirana zyrtare përshëndet votimin, kërkon heqjen e vizave nga BE
Tirana zyrtare ka reaguar ndaj votimit të Demarkacionit në Kuvendin e Kosovës, duke e përshëndetur ratifikimin e marrëveshjes kufitare mes Kosovës dhe Malit të Zi dhe duke kërkuar tashmë nga BE- ja që të japë liberalizmin e vizave për qytetarët e vendit. Presidenti i Shqipërisë, Ilir Meta, e cilësoi votimin e së mërkurës si një përmbushje e dëshirës së qytetarëve të Kosovës për të lëvizur të lirë e për realizimin e aspiratës së tyre të integrimit ne Bashkimin Europian. Ndërsa Kryeministri Edi Rama, përmes një statusi në ‘ Facebook’, e ka quajtur një sukses të madh votimin dhe ka shtuar se kalimi i Demarkacionit duhet të ishte bërë më herët. “Super Vota për Demarkacionin një votë e vonuar, por kuptimplotë për Kosovën si shtet që dëshmon seriozitet në angazhimet e veta. Tani Bashkimi Europian t’i përmbahet pa vonesë angazhimit të vet: Liri lëvizjeje pa viza në Europë për qytetarët e Kosovës”, shkruan Rama. Kreu i Partisë Demokratike, Lulzim Basha, e ka konsideruar miratimin e marrëveshjes së Demarkacionit si një akt thelbësor në marrëdhëniet e fqinjësisë së mirë dhe stabilitetit në rajon.