Kamenica dhe tenori grek Salampasopoulos
Koncerti ” Bridges of Musical Tradition”, si një nismë e ambasadës greke në Tiranë në bashkëpunim me TKOB, bashkoi në Tiranë të enjten në mbrëmje tenorin grek, Stavros Salampasopoulos dhe mezzo- sopranon shqiptare, Vikena Kamenica. Ata shoqëroheshin nga orkestra e TKOB- s, nën drejtimin e dirigjentit grek, Eleftherios Kalkanis, në sallën e mbushur të Qendrës Kulturore të Kishës Ortodokse të Ngjalljes së Krishtit në Tiranë. Publiku i shumtë, shqiptar dhe grek, që ndoqi koncertin, pati rastin të dëgjojë shumë nga këngët më të bukura të dy vendeve, të cilat u interpretuan me nivel të lartë nga dy artistët, nën shoqërimin e përkryer nga muzikantët virtuozë të orkestrës. “Kemi nderin t’i prezantojmë publikut artdashës, bashkë me ambasadoren e Greqisë zonjën Sourani, një dëshmi të bashkëpunimit kulturor mes dy vendeve, që ka si urë lidhëze, muzikën tradicionale dhe muzikën e kompozitorëve më të mirë të dy vendeve”, tha drejtoresha e TKOB- s, Zana Çela. Një ditë më vonë, i njëjti koncert, me ‘ perlat’ e muzikës greke dhe shqiptare, tradicionale dhe moderne, u admirua nga të ftuarit dhe të pranishmit në Teatrin “Petro Marko” të qytetit të Vlorës.