Ahmetaj: Tatimfitimi 5%, pragu i xhiros 14 milionë lekë
“Ulje të tatimfitimit përfitojnë 10,800 biznese. Ndryshon ligji i koncesioneve, do hiqen ofertat e pakërkuara të privatit”
Ulja e tatimfitimit nga 15 për qind në 5 për qind do të paguhet për bizneset me xhiro deri në 14 milionë lekë.
Tatimfitimi 5 për qind aktualisht paguhet nga bizneset që janë në fashën e xhiros nga 5 milionë lekë deri në 8 milionë lekë. Të përjashtuar nga tatimfitimi janë bizneset me xhiro deri në 5 milionë lekë. Ministri i Financave dhe Ekonomisë, Arben Ahmetaj, dje në konferencën për shtyp deklaroi se pragu që do të ndajë biznesin që nuk paguan tatimfitim dhe ata që do të paguajë 5 për qind, do të rritet deri në 14 milionë lekë. Ministri Ahmetaj njoftoi se në paketën e re fiskale do të ketë ulje të taksave edhe për bizneset që lidhen me bujqësinë, agroturizmin, si dhe do të hiqet TVSH për makineritë dhe pajisjet e importit për disa teknologji. ULJA E TAKSAVE Kreu i Financave, Arben Ahmetaj, tha se drafti me ndryshimet për uljen e tatimfitimit do të hyjë në fuqi brenda 1 janarit 2019. Ministri Ahmetaj u shpreh se nga ulja e taksës përfitojnë 10,850 biznese. “Bizneset nga 8 deri në 14 milionë do të kenë tatimfitimin 5 për qind. Ministria e Financave ka materializuar draftligjin për vendimmarrje në institucione të tjera dhe besojmë që ky ndryshim do të hyjë në fuqi jo më vonë se 1 janari i vitit 2019. Për statistikë, janë 21 mijë sipërmarrje që janë objekt i tatimfitimit 15 për qind, me luhatje të qarkullimit nga zero deri në miliarda dhe nga këto 21 mijë biznese, 10.800 apo 50 për qind të tyre, iu zbritet tatimfitimi në 5 për qind. Pra, duke iu shtuar dhe atyre që përfitojnë nga tatimfitimi i thjeshtësuar, bëhen mbi 93 mijë biznese që kanë përfituar ulje të drejtpërdrejtë takse, që do të thotë nga 110 mijë biznese aktive, rreth 93- 95 mijë e kanë tatimfitimin nga 5 deri në zero. 90 për qind e bizneseve të Republikës së Shqipërisë kanë përfituar ulje takse që në mandatin e parë dhe të dytë të qeverisë Rama”, u shpreh Ahmetaj. Pas hyrjes në fuqi të ndryshimeve fiskale, tatimfitimi 5 për qind do të paguhet për bizneset në fashën e xhiros nga 5 milionë lekë deri në 14 milionë lekë. Përfitues të drejtpërdrejtë të uljes së taksës nga 15 për qind në 5 për qind janë bizneset me xhiro mbi 8 milionë lekë deri në 14 milionë lekë.
KONCESIONET Qeveria do të ndryshojë ligjin e koncesioneve. Ministri i Financave dhe Ekonomisë, Arben Ahmetaj, tha se do të hiqen ofertat e pakërkuara nga privatët dhe do të rriten kontrollet për efektet fiskale të kontratave. Ministri Ahmetaj tha se ndryshimet ligjore hyjnë në fuqi në mesin e vitit 2019. “Është sërish një iniciativë e Kryeministrit për të riparë ligjin e koncesioneve me shumë përgjegjësi dhe ne e kemi kaluar për vendimmarrje, materializuar nga Ministria e Financave si draftligj ndryshimet në ligjin për koncesionet, PPP- të. Ajo që bën diferencë është heqja e propozimeve të pakërkuara nga sektori privat. Besoj do të jetë në fuqi, edhe në varësi të vendimmarrjes, në mes të vitit 2019 e tutje, që do të thotë se nuk do të ketë më oferta të pakërkuara. Ofertat do të jenë të kërkuara dhe sigurisht që, në rastin ku ato do të bëhen të kërkuara, studimi i fizibilitetit bëhet nga institucionet qeveritare. Ekspertiza e socializuar për zhvillimin e projekteve të koncesioneve, që do të futet në ligj; rritja e kontrollit të implikimeve fiskale të kontratave që koncesionit; mekanizmat e zëvendësimit të koncesionarëve në bashkëpunim me institucionet financiare”, deklaroi ministri.