Tusk për Trump: Me miq të tillë, kujt i duhen armiqtë
“Nëse ju duhet një dorë ndihme, do ta gjeni në fund të krahut tuaj”
Presidenti i Këshillit të Europës, Donald Tusk, ishte shumë i prerë në kritikat ndaj politikave të administratës Trump, sa ka përdorur frazën “kujt i duhen armiqtë, me miq të tillë”!
Kjo ishte fraza më e fortë që ka përdorur ai për të komentuar marrëdhëniet mes BE- së dhe SHBA- së, me ndryshimet e politikave që kanë nisur që me nisjen e mandatit të Presidentit Donald Trump. Në fillim të samitit të liderëve europianë, çështjet e rendit të ditës, pikë për pikë, kanë të bëjnë me kriza që shumë europianë i shohin si të nxitura nga Presidenti Trump. Tusk përmendi “dëshirat kapriçoze të administratës amerikane” mbi disa çështje, përfshirë Iranin, Gazën, tarifat tregtare dhe Korenë e Veriut. Në komentet ndaj gazetarëve dhe një mesazh në “Twitter” më vonë, ai sugjeroi se Shtëpia e Bardhë kishte humbur kontaktin me realitetin. Ai tha se Europa nuk kishte nevojë për armiq kur kishte miq si Shtetet e Bashkuara, si dhe nxiti udhëheqësit europianë të mos ishin të varur nga Uashingtoni. Sipas “Washington Post”, vetëm 16 muaj më parë, komentet e tilla do të ishin të paimagjinueshme nga një lider në BE, një union i modeluar me imazhin e SHBA- së pas Luftës së Dytë Botërore. Sipas shumë diplomatëve europianë, dëshirat e zhvendosura e bëjnë gati të pamundur të negociojnë me Shtëpinë e Bardhë, sepse ata nuk mund të bëjnë një ujdi për t’u afruar me atë që dëshiron Trump, kur ai nuk e njeh as vetë atë çfarë kërkon. Tusk, ishKryeministër i Polonisë, i cili tani kryeson Këshillin e Europës, e shfaqi plotësisht hapur zemërimin e tij ndaj metodave të Trump dhe efekteve që po shkakton politika e tij në Europë. “Duke parë vendimet e fundit të Donald Trump, dikush mund të mendojë: Me miq të tillë, kush ka nevojë për armiq? Por, duke folur sinqerisht, Europa duhet të jetë mirënjohëse nga Presidenti Trump. Sepse, falë tij, hoqëm iluzionet. Ai na ka bërë të kuptojmë se nëse keni nevojë për një dorë ndihme, do të gjeni në fund të krahut tuaj”, tha Tusk në hapjen e samitit në Sofje, Bullgari. Negociatorët në BE kanë thënë se si një nga partnerët më të afërt tregtarë të Shteteve të Bashkuara, ata nuk do të bëjnë lëshime me një armë në kokë, duke iu referuar kërcënimeve nga SHBA.