Garcia: Partizani më befasoi, fitorja më kënaqi
Trajneri i Salzburgut u thur elozhe kryeqytetasve
Trajneri i Salzburgut, Oskar Garcia, ka pranuar se fitorja e skuadrës së tij në takimin e djeshëm ndaj Partizanit ishte shumë e vështirë. "E kemi pasur shumë të vështirë që të krijonim mundësi shënimi përballë një skuadre si Partizani, që ka luajtur në nivele të larta dhe ka lojtarë të shkëlqyer në përbërje. Ata na kanë lënë shumë pak hapësira dhe duhet të jemi shumë të kënaqur me këtë fitore. Ndeshjen e kthimit e pres edhe më të vështirë", ka thënë Garcia për faqen zyrtare të klubit pas ndeshjes. Ndërsa për mediat shqiptare trajneri është treguar disi më i rezervuar, duke u shprehur se skuadra e tij është më favorite për t'u kualifikuar pas rezultatit të arritur në sfidën e djeshme. Partizani pati tri raste shënimi. Mendoni se ishte më superior? E bukura është që gjithsecili ka mendimin e tij. Me sa duket, ky është opinioni juaj. Do të veçonit ndonjë lojtar të kundërshtarit? Jo ndonjë në veçanti. Megjithatë, dua të komplimentoj klubin,
forcën e grupit dhe veçanërisht elementët e rinj të talentuar që kanë. Çfarë mendoni për ndeshjen e kthimit, si e prisni atë? Pres të njëjtën gjë pak a shumë si këtu, por me lojë më të përqendruar në zonat e ngushta.
Soriano mori një dëmtim dhe u detyrua të dilte nga fusha. Tani që ndeshja ka përfunduar, si është gjendja e tij? Ka marrë një goditje të rëndë dhe na duhet të presim për të mësuar më tepër. Të shpresojmë që të jetë i disponueshëm javën tjetër.
Mendoni se te loja juaj ndikuan edhe kartonët? Kjo gjë ndodh te lojtarët e rinj. Me sa duket, Samasekou s'e ka kuptuar që është ndëshkuar herën e parë me të verdhë duke përsëritur sërish të njëjtin gabim. Në pjesën e parë patët disa
defekte në lojë... Ne jemi ekip modest. Nuk jemi as Bajerni dhe as Barcelona. Natyrisht ka shumë hapësira për përmirësim. Mendoj se ndeshjen e kthimit do ta përgatisim gjithashtu me kujdes duke qenë se jemi disi më favoritë për të fituar.