Ishte DHZK-ja që i shoi shpresat klubit
Në fund të qershorit, Arbnor Fejzullahu, nga dëshira e madhe për t'u transferuar në Korçë, vendosi që të niste "gjyqin" me Partizanin. Fejzullahu kërkonte të largohej nga të kuqtë, pasi më herët kishte një akord paraprak me Skënderbeun. Por, vendimi i dhënë më datë 29 qershor nga ana e Dhomës së Zgjidhjes së Konflikteve pranë FSHF-së, i jepte të drejtë klubit kryeqytetas dhe detyronte lojtarin që të kthehej në stërvitje me ekipin. Për këtë veprim, te Partizani e kanë gjobitur 23-vjeçarin edhe me 10500 euro. Bazuar në këtë vendim të DHZK-së, mbrojtësi nga Presheva është i detyruar që të qëndrojë te "demat" të paktën deri në fund të sezonit.