"Tragjikomedia", bie nga shkallët dhe dëmtohet rëndë

Kur je atlet profesionist ka shumë mënyra të ndryshme për t'u dëmtuar, por ajo e Havier "Çiçarito" Hernandezit i ka kaluar të gjitha ato të kolegëve të tij për nga origjinaliteti. Jo më kot, media gjermane dhe ajo europiane e ka quajtur një "tragjikomedi". Futbollisti meksikan është rrëzuar keq nga shkallët e banesës së tij, duke pësuar një frakturë të kockës së parakrahut të djathtë. Ky dëmtim do t'i kushtojë sulmuesit të skuadrës së Bajer Leverkusenit debutimin e tij në Bundesligë për sivjet, të shtunën, kundër Borusia Mynshengladbahut. Incidenti i ndodhur në shtëpinë e tij gjithsesi nuk është aspak i lehtë, sepse për ishlojtarin e Mançester Junajtid, stafi mjekësor ka urdhëruar të paktën dy javë qëndrimi jashtë fushave dhe vetëm më pas 28-vjeçari "Çiçarito" Hernandez do të mund të kthehet në stërvitje dhe të jetë në dispozicion të skuadrës së drejtuar nga Roger Shmidt.