Kalendari "autostradë", 10 ndeshje radhazi në shtëpi

Tirana është "fiksuar" pas barazimeve. Që prej nisjes së këtij sezoni nuk ka fituar dhe as ka humbur asnjë ndeshje, ndërsa në 4 javë ka grumbulluar vetëm 4 pikë. Një start larg pritshmërie. E, megjithatë, me mbylljen e derbit ndoshta fati kalon në anën e bardhebluve. Mjafton të shohësh kalendarin e kryeqytetasve në 10 ndeshjet e ardhshme (përfshi të dy kompeticionet, kampionat e Kupë) dhe e kupton qartazi se do ta ketë "autostradë".

Favorizimi nis që me Kupën e

Shqipërisë, ndërsa sot pret Sopotin. Edhe pse duhet ta luanin në transfertë ndeshjen e parë të turit të parë, klubet kanë vendosur që të luhet në "Selman

Stërmasi", ashtu si dhe ndeshja e kthimit. Nga java e 5-të e

Kategorisë Superiore dhe deri në të 11-ën pritet që të mos kenë asnjë transfertë. Me Korabin do luhet në shtëpinë e bardhebluve, pasi siç dihet dibranët kanë lidhur kontratë për të përdorur këtë impiant. Por, edhe një tjetër ndeshje që duhet të luhej jashtë fushe, mund të zhvillohet sërish në kryeqytet. Konkretisht Luftëtari-Tirana, që përkon me javën e 8-të, mund të ketë "rokadë". Nëse stadiumi "Gjirokastra" nuk do të jetë gati deri atëherë, bluzinjtë mund të luajnë në "Selman Stërmasi", ashtu sikundër kanë vepruar me të gjitha shtëpiaket që kanë pasur. Dhe, nëse ndodh kështu, transfertat për Tiranën do të nisin vetëm pas një muaji në Kukës, konkretisht më 26 nëntor. A. M