“Nuk zgjedh dot mes Dortmundit dhe Liverpulit”
"Muri i Verdhë" i Dortmundit apo "The Kop" i Liverpulit? Si u bë trajner dhe lojtari i tij i preferuar në Premier Ligë. Jyrgen Klop, i ftuar gjatë "Monday Night Football" në "Sky Sports", bashkëbisedoi me Xhemi Karragerin përpara fitores së Bërnlejt në "Turf Moor".
Muri - "Është një gjë e ndryshme. Sepse asgjë nuk krahasohet me ' Murin e Verdhë' ku qëndrojnë 27 mijë tifozë. Por edhe tribuna e re e Liverpulit mban 22 mijë vetë dhe unë kurrë më parë nuk kam parë një atmosferë të tillë dhe 30 minuta që ata më kanë ofruar në 'Anfield' nuk i kam parë te Dortmundi. Por unë nuk dua të bëj krahasime. Jam me fat që kam qenë në dy klube kaq të mëdha."
Lojtari më i rrezikshëm - "Ka shumë, por më pëlqen David Silva. Nuk e di nëse ai është më i rrezikshmi, por ai është futbollist i shkëlqyer".
Premier Liga - "Ka 9 ekipe që mendojnë se duhet të jenë të parat. Është pa dyshim kampionati më rivalizues në Europë".
Shanset e Liverpulit - "Jam i lumtur që bastet na parashikojnë ekipin e dytë favorit ( Qesh). Unë nuk i kuptoj këto koeficientet. Çfarë thonë?"
Ai si lojtar - "Isha mesatar. Isha me të vërtetë i shpejtë dhe i mirë me kokë, por kaq."
Firmino - "Është lojtar që përfshihet gjithmonë, në sulm dhe mbrojtje, sepse ai ka një dhunti natyrale. Ai nuk mendon shumë, por është një lojtar instinktiv."
Si u bë trajner - "Po të jesh një lojtar i kategorisë së dytë në Gjermani nuk fiton shumë. Unë nuk jam njeriu më i zgjuar në botë, por as shumë idiot, kështu që mund të kisha një karrierë të dytë në diçka tjetër, por nuk e dija në çfarë. E dija që nëse dikush do të më jepte një shans për të stërvitur një skuadër, unë do ta bëja më mirë sesa të luaja vetë."