Gjasula: Në kombëtare grumbullohen për interes

"Është e habitshme, s'ftohen ata që aktivizohen në Gjermani"

Mesfushori Jurgen Gjasula mendon se në Kombëtare nuk ka merita dhe shumë gjëra bëhen vetëm për interes. Ai shpreh keqardhje që nuk ishte pjesë e kampionatit europian "Francë 2016", por është i ndërgjegjshëm...

Mesfushori Jurgen Gjasula mendon se në Kombëtare nuk ka merita dhe shumë gjëra bëhen vetëm për interes. Ai shpreh keqardhje që nuk ishte pjesë e kampionatit europian "Francë 2016", por është i ndërgjegjshëm që vendimet i takojnë trajnerit. Fantazisti, i cili luan në Bundesligën 2 për Grojter Furthin, në një bisedë për revistën "Who" theksoi se trajneri De Biazi merr lojtarë që nuk aktivizohen as në klube. "Ndeshjen me Izraelin nuk e ndoqa, vetëm rezultatin pashë. Personalisht nuk e kuptoj dot se si ka mundësi që lojtarët që luajnë në Gjermani nuk grumbullohen, ndërsa ata lojtarë që as nuk luajnë në ekipe të veta, grumbullohen?! Por, kjo është diçka që i takon trajnerit dhe më vjen keq ta them, por në Shqipëri bëhen shumë gjëra vetëm për interes. Normale që u mërzita për mungesën në Francë. Kisha shumë dëshirë të luaja për ven- din ku kam lindur, pasi me zemër jam 100% shqiptar. Po këto gjëra nuk janë në dorën time", thotë futbollisti i lindur në Tiranë dhe i grumbulluar vetëm tri herë nga De Biazi. Aktualisht 31-vjeçari është duke u riaftësuar nga një dëmtim i rëndë, që e ka lënë jashtë fushave për disa muaj. "Në fund të muajit shtator, më saktë në datën 28 shtator, u dëmtova në stërvitje në thembrën e njërës këmbë. Shpresoj shumë që, në fund të muajit janar, të mund të rifilloj sërish me ekipin. Kam qenë shumë i mërzitur, shumicën e kohës e kam kaluar te prindërit. Ata më kanë ndihmuar shumë. Në 5-6 javët e para kam qëndruar gati vetëm në shtëpi, pasi isha me paterica", tregon Gjasula, i cili zbulon profesionin që do të kishte nëse nuk do të ishte bërë futbollist. "Këto vitet e fundit kam mësuar edhe të bëj DJ. Besoj se, nëse nuk do të isha bërë futbollist, do të isha DJ".