Transfertat një makth, Branica: Nuk do zhgënjejmë
Shkumbini do të tentojë sërish që të thyejë tersin e rezultateve në transfertë. Sot në Fier peqinasit kërkojnë të mos dalin duarbosh nga përballja me Apoloninë. Trajneri i peqinasve, Sokol Branica, pranon se skuadra vuan një lloj ngërçi psikologjik në takimet jashtë Peqinit. Por, nga ana tjetër, ai pohon për "Panorama Sport", se në asnjë përballje ekipi i tij nuk ka qenë inferior ndaj kundërshtarit. "Me bindje e them se në disa takime që ne kemi zhvilluar në transfertë, kemi luajtur në mënyrë të barabartë me kundërshtarin. Ndërsa në disa momente, ndoshta jemi ndëshkuar edhe padrejtësisht, prandaj kam kërkuar korrektësi në aspektin e gjykimit. Sot përballë Apolonisë, një skuadër që është relativisht e fortë, do të kërkojmë të thyejmë tersin e humbjeve në transfertë. Do të tentojmë që të dalim me një rezultat pozitiv nga Fieri dhe për këtë jemi optimistë. I gjithë grupi është në dispozicion, përveç Isajit. Do të luajmë me besim të plotë për të arritur qoftë edhe një pikë", deklaroi kreu i pankinës peqinase. Në Fier, Shkumbini do të luajë me dy sulmues, Mustafajin dhe Aliajn. F.Ahmeti