Kukësi, gati të përforcohet me një mbrojtës nga Greqia
Presidenti i Kukësit, Safet Gjici, pak ditë më parë, i ftuar në emisionin "Procesi Sportiv", tha se skuadra e tij është duke menduar për merkaton. Megjithatë ai nuk preferoi që të bënte publikë emra konkretë. Por, mësohet se verilindorët po mendojnë të bëjnë pjesë të ekipit të tyre Simon Rumbullakun që është pjesë e skuadrës së Apollon Smirnës në kampionatin grek të futbollit. Lojtari nuk ka arritur të gjejë hapësira në skuadrën e tij aktuale dhe është gati të provojë një aventurë në Kategorinë Superiores. Megjithatë do të mbetet për t'u parë nëse lojtari do të bindë trajnerin Gjoka dhe do të bashkohet me verilindorët për gjysmën e dytë të sezonit. Duhet theksuar se për momentin bëhet fjalë vetëm për zëra merkatoje.