Privatizimi i klubit, ja relacioni i Bashkisë Vlorë
"Asetet nuk i shesim, administrimi nga privati është efikas"
Zbardhet relacioni i Bashkisë së Vlorës për privatizimin e klubit të Flamurtarit. "Panorama Sport" ka siguruar ekskluzivisht dokumentin që mban firmën e nënkryetarit të bashkisë, Ilir Banushi. Në nisje të relacionit përshkruhet domosdoshmëria e privatizimit të klubit, duke u theksuar fakti se bashkia e ka të vështirë për ta mbajtur klubin. "Kalimi nën një administrim të plotë privat do ta kthente këtë shoqëri në një shoqëri efikase dhe Bashkinë Vlorë do ta çlironte nga një detyrim financiar, ligjor e moral, i cili është i vështirë, për të mos thënë i pamundur për t'u përmbushur. Kjo, për shkak se koha dhe përvoja e gjerë kombëtare dhe ndërkombëtare, mbi këto lloje shoqërish, ka treguar se të gjithë argumentet shkojnë në favor të administrimit privat. Me vendimin nr.24, datë 03.10.2013, Këshilli i Bashkisë Vlorë ka përcaktuar që administrata e shoqërisë të ndërmarrë procedurat e duhura për shitjen e aksioneve të shoqërisë. Gjatë kësaj periudhe, me vendimin 39, të Këshillit të Bashkisë, datë 31.07.2014, dhe vendimin nr. 38 datë 28.07.2016, është dhënë në administrim të plotë të kompanive "Trk Group" dhe "Atlasjet". Theksojmë se kjo formë organizimi është një formë kalimtare, deri në përfundim të procesit të privatizimit", thuhet fillimisht në relacionin e bashkisë.
Suksesi dhe dështimi
"Përvoja e shoqërive të tjera, të kësaj natyre në Shqipëri, kanë provuar se administrimi nga privati (individ apo shoqëri) është shumë më tepër efikas, për vetë natyrën e objektit të veprimtarisë së saj. Vetë rezultatet e arritura në këto vite e provojnë këtë. Klubet, që administrohen
nga Bashkitë, kanë arritur rezultate jo të mira në Kategorinë Superiore, shpeshherë në kufij mbijetese. Shumica e tyre, ndonëse përfaqësojnë ekipe me traditë dhe qytete të rëndësishme në vend, ndodhen prej vitesh në kategoritë inferiore. Mjafton të përmendim qytete të tilla si Lushnja, Elbasani, Berati etj. Prej vitesh, Bashkia Vlorë ka financuar këtë aktivitet nëpërmjet buxhetit të saj deri në vitin 2013. Të gjitha këto shuma kanë pasur si qëllim vazhdimin e aktivitetit, pasi në vetvete shoqëria nuk ka fitim". Mbyllja e një cikli
"Duke qenë një aktivitet
sportiv, por në të cilën tregu privat ka treguar se ka interes, është e mundur që të çlirohen këto fonde për t'i përdorur në një destinacion tjetër, ashtu si ka ndodhur dhe gjatë këtyre dy viteve të fundit. Situata e krijuar, ku të gjithë financimet janë kryer nga kompanitë e mësipërme, është një përvojë e mirë në këtë drejtim. Shumat, të cilat janë investuar në infrastrukturë, menaxhim etj., nga këto kompani, janë të tilla që buxheti i bashkisë i këtyre viteve do ta kishte të pamundur t'i kryente. Me anë të këtij procesi, ne paraqesim objektivin për të mbyllur një cikël dhe për të hapur një cikël të ri. Menaxhimi i këtij aktiviteti nga fondet publike do të ishte kosto e madhe financiare, por dhe me rezultate të padëshirueshme nga të gjithë", thuhet në relacionin që mban firmën e nënkryetarit. Asetet nuk shiten
Bashkia shpjegon se procesi i shitjes së aksioneve nuk ka të bëjë me shitje asetesh, si prona, terrene, ndërtesa etj., por kjo pjesë nuk përqafohet nga administratori aktual i Flamurtarit, Sinan Idrizi. "Menaxhimi i një veprimtarie të tillë përballet shpesh me vendimmarrje të vështira, të cilat legjislacioni aktual nuk ka mundësinë t'i plotësojë. Në radhë të parë, për vetë objektin e veprimtarisë së saj dhe specifikat e tjera që kërkohen për realizimin e objektivave të shoqërisë, kohën e ushtrimit të veprimtarisë, kapitalin e tyre etj. Për këto shoqëri ka një vakum ligjor dhe administrimi i tyre si kompani publike është tepër i vështirë. Kjo e vë në vështirësi menaxhimin e një shoqërie, që ka një objekt të tillë veprimtarie nga ana e një Bashkie, kushdoqoftë ajo dhe pavarësisht financave të saj. Në një shoqëri me administrim privat, këto pengesa nuk ekzistojnë. Për të saktësuar përfundimisht autoritetin
kompetent, i cili ka të drejtë të shesë aksionet e shoqërisë, në muajin shkurt 2016, i jemi drejtuar me shkresë Ministrisë së Ekonomisë dhe kemi marrë përgjigje se autoriteti, i cili mund të kryejë shitjen, është vetë përfaqësuesi i shoqërisë, bazuar në ligjet ' Për ankandin' dhe ' Për tregtarët dhe shoqëritë tregtare'. Në këtë mënyrë, mendojmë se Bashkia Vlorë e ka rrugën e hapur për të vazhduar më tej procesin e nisur. Gjithashtu më parë është bashkëpunuar me një ekspert të fushës, i cili ka përgatitur dhe një guidë me hapat e duhur për këtë çështje. Gjatë kësaj periudhe, ashtu siç është pasqyruar edhe më parë, janë marrë konsultime me publikun dhe janë zhvilluar sondazhe të ndryshme në lidhje me pjesën e kuotave që mund të shiten. Duhet theksuar se procesi i shitjes së aksioneve ka të bëjë me procesin e shitjes së një të drejte për pjesëmarrje në aktivitete sportive dhe përfitimet përkatëse që rrjedhin nga kjo, procesin e shitjes së emrit të klubit dhe të gjithë atë që ky emër përfaqëson. Pra, është një proces që nuk ka të bëjë me shitje asetesh", përfundon relacioni i bashkisë.