Juventusi, logo e re “e kopjuar” nga një fabrikë... sallamesh
Akuza për kopje edhe nga Zhezus dhe tenisti Soderling
“Ta lëmë të shkuarën prapa, përfshirë edhe humbjen me Fiorentinën". Të hënën në mbrëmje, në Muzeun e Shkencës dhe Teknologjisë, në Milano, Juventusi ka prezantuar logon e re, një revolucion total kundrejt së kaluarës, sepse ndërsa gjithmonë ka figuruar një stemë normale, mes ngjyrave bardhezi dhe një zebre, tani e në vazhdim klubi bardhezi do të ketë vetëm një "J", më saktë një dopio "J", të dizenjuar nga kompania "Interbrands". Prezantimi i kësaj logoje është shoqëruar nga një mbrëmje madhështore, me shumë të ftuar "VIP", ku ato që spikatën ishin modelja Emili Rajtakovski dhe këngëtarja me origjinë shqiptare, Rita Ora, të cilat tërhoqën si me magnet shumë prej lojtarëve të "Zonjës së Vjetër", për të bërë foto me to, por edhe dy stilistët "Dolce & Gabbana" e shumë e shumë të tjerë. Video madhështore që shoqëroi këtë risi vijoi me deklaratën e presidentit të Juventusit, Andrea Anjeli, i cili u pa shumë i sigurt për hapin e ndërmarrë: "Logo e re përkufizon stilin dhe na mundëson komunikimin dhe mënyrën tonë të të qenit, gjithmonë duke ecur me kohën, pa frikë nga ndryshimet dhe natyrisht në kërkim të fitores së radhës". Tifozët sulmojnë
Por, nëse krerët e klubit dhe lojtarët ishin të gjithë të ekzaltuar, ata që nuk e kanë pritur mirë kanë qenë tifozët. Të paktën, pas shpalljes së logos së re kanë ardhur me miliona reagime, ku kryefjala ka qenë "shokimi" i tyre, sepse me sa duket kjo risi nuk u ka pëlqyer atyre. "Po bëni shaka me siguri?!", ishte komenti më i shpeshtë, i shoqëruar shpeshherë edhe më logon e vjetër, e cila gjithsesi do të qëndrojë në fanellë deri në fund të sezonit. Dhe pa dyshim që një protestë e tillë ul disi entuziazmin në klub, ndonëse askush, duke nisur nga Andrea Anjeli, s'ka ndër mend ta ndryshojë.
Sa akuza për kopje!
Sikur të mos mjaftonin pakënaqësitë e komenteve, në media dhe sidomos në rrjetet sociale kanë nisur të dalin edhe akuza të mundshme në lidhje me kopjimin e kësaj logoje të re të Juventusit, i cili thjesht ka zgjedhur mes disa punimeve. Ajo që ka bërë më shumë bujë lidhet pa dyshim me ngjashmërinë e frikshme mes logos së re të bardhezinjve dhe një fabrike sallamesh e proshutës në Spanjë, "JJ Carreras", e cila është në treg që prej vitit 1986. Pa dyshim që satira dhe ironia nuk ka munguar. Një tjetër sulm ka ardhur nga ish-mbrojtësi i Interit, aktualisht te Roma, Zhuan Zhezus, i cili nuk ka ngurruar pa postuar mendimin e tij për "vjedhje" në rrjetet sociale, duke iu referuar dy germave "J" të emrit të tij. Edhe ish-tenisti Robin Soderling, fitues i 10 "ATP"-ve në karrierë dhe numri 4 në botë deri në vitin 2010, përpara se të tërhiqej, ka reaguar, duke u
mbështetur më shumë te grafika e njëjta e përdorur, pavarësisht se inicialet e emrit nuk kanë lidhje me "J"-në e Juves. Tjetër "kopje"
Kjo nuk është hera e parë që Juventusi është i përfshirë në një çështje kopjimi. Prezantimi i fushatës së abonimeve për sezonin
2015-2016 i "Zonjës së Vjetër" shihte fytyrën e një vajze të vijëzuar bardhezi që festonte, e njëjta me atë që kishte përdorur skuadra spanjolle e kategorive inferiore Badajoz, një gafë e cila bëri shumë bujë mes njerëzve që merren me marketingun e Juves.
Porto ironizon
Në fund, nuk ka munguar edhe reagimi i rivalëve të ardhshëm në Ligën e Kampioneve, Porto, të cilët kanë bërë një postim sfidues dhe ironik: "Komplimente për logon e re! Fat të mbarë, duke nisur nga korriku!".