Baka bëhet çështje, tifozët kundër kolumbianit
Ish-bomberi i Sevijes del "thatë" edhe kundër Fiores
Milani mundi të di elën Fiorentinën me rezultatin 2-1, duke i qëndruar pas "trenit" që të çon në Europë, mirëpo ndoshta skuadra ka humbur përfundimisht Karlos Bakën. Sulmuesi kolumbian qëndroi në fushë 90 minuta kundër skuadrës vjollcë, mirëpo, edhe një herë tjetër, u duk jashtë kontekstit taktik të trajnerit Vinçenco Montela. Paraqitja e tij nuk u pëlqeu aspak as tifozëve të Milanit, të cilët nuk humbën rastin për ta vërshëllyer sa herë prekte topin me këmbë. Mungesa e Bonaventurës ka ulur ndjeshëm nivelin e lojës së kuqezinjve, që tani vuajnë cilësitë e lojtarit në mesfushë. Mes daljeve nga fusha duke protestuar me trajnerin dhe mungesës së golit për një kohë të gjatë, Baka është një ndër problemet më të mëdha të Milanit të Montelës. 30-vjeçari, i cili kishte mësuar tifozët kuqezi me një mesatare të lartë goli, në këtë sezon nuk po tregon dot më një rendiment të ngjashëm me atë të vitit të kaluar. Ajo që bie më shumë në sy është mungesa e Bakës në manovrën ofensive të Milanit dhe "steriliteti" i tij në zonën kundërshtare. Me ekipin në vështirësi për shkak të presionit të Fiorentinës, Baka u sakrifikua duke luajtur i tërhequr, mirëpo, në këtë mënyrë, i mundësoi kundërshtarit të zgjatet më shumë në zonën e Milanit. Gabimet në pasime dhe nervozizmi ndaj shokëve të ekipit acaruan publikun në "San Siro", i cili vërshëllente sa herë që Baka e prekte topin me këmbë. Sigurisht që ish-sulmuesi i Sevijës nuk është një futbollist që luan dhe sakrifikohet për skuadrën, por një bomber zone që nuk fal sa herë i jepet mundësia për të shënuar. Duhet thënë se loja e Montelës nuk favorizon karakteristikat
e 30-vjeçarit, por në të njëjtën kohë edhe ky i fundit nuk është i qetë. Sakaq, mungesa e Bonaventurës reflekton shumë te sulmuesit, që nuk mund të shfrytëzojnë pasimet e 28-vjeçarit. Futbollisti që e zëvendëson, Deulofeu, është më i orientuar për të
provuar portën, teksa të dielën është vërejtur një bashkëpunim i vogël me Bakën. Sakaq, duket qartë që edhe Suso është jashtë forme në takimet e fundit dhe gjithmonë i dubluar nga dy kundërshtarë. Me pak fjalë, Milani është në kërkim të një vendi në
Europë dhe ka "frymëmarrjen e shkurtër", por po reziston shumë mirë. Mirëpo, për të arritur ta konkretizojë me sukses objektivin që mbart, kuqezinjtë duhet të mbështeten edhe te golat e Karlos Bakës, detyrë që kolumbiani e bënte shumë mirë vetëm pak kohë më parë.