Luftëtari, Milinkoviç bën "bomberin" në stërvitje
Luftëtari i Mlladen Milinkoviçit nuk dorëzohet pas humbjes me kampionët e vendit, por vijon përgatitjet për ndeshjen e radhës, atë me Laçin. Të prirë për të rikthyer dinjitetin e emrit të Luftëtarit të viteve '70-'80, gjirokastritët sfidën me Laçin në kuadër të javës së 23-të e shohin më shumë se jetike për vijimësinë. Parë me syrin vëzhgues të trajnerit Milinkoviç, Luftëtari i ka të gjitha potencialet për të mos zhgënjyer në shtëpi. Në seancën e parë stërvitore të postsfidës me Skënderbeun, Luftëtari kishte vetëm dy mungesa, portierin Festim Miraka dhe sulmuesin Dejvi Bregu. Pavarësisht ndeshjes në Korçë, trajneri i bluzinjve ka zhvilluar një seancë stërvitjeje në fushën e vjetër. Ngarkesa fizike e 90-minutëshit me Skënderbeun si dhe kilometrat e përshkuara duket se kanë mjaftuar për zhvillimin e një programi stërvitor të mbështetur mbi platformën e seancës me karakter shkrythës.
"Bomberi" Milinkoviç - Teksa Luftëtari nën drejtimin e dyshes Papa- Jovanoviç vijonte përgatitjen me grupin duke u përqendruar në lojën e rrjedhshme dhe qarkullimin e topit në kuadrate të ngushta si dhe vrapimet e shkurtra për lojtarët që të ruajnë kondicionin optimal fizik, Milinkoviç dhe Musiaris duket se kishin zgjedhur një tjetër model stërvitjeje. Trajneri serb e ka treguar edhe një herë tjetër se është një "snajper" i vërtetë në goditjet nga distanca. Me saktësinë e tij, tekniku i bluzinjve ka imponuar gardianin e ri, Olti Qyrani, të nxirrte disa herë topin nga porta. Në këtë "eksperiment", trajneri Milinkoviç ka treguar saktësi dhe potencë në ekzekutimin e goditjeve të improvizuara të dënimit nga distanca. Trekëndëshet e portës së Qyranit janë shënjestruar disa herë saktë nga tekniku Milinkoviç, i cili, përveç golave të shënuar, ka detyruar portierin e ri në moshë që të "fluturojë" jo pak raste në tentativë për të kuptuar goditjen. T.Shehu