Bajerni nuk ka mëshirë, i shënon 8 gola Mavrajt
Kampionët dhurojnë spektakël, Levandovski shënon tripletë
Hamburgu përjeton "cunamin" e radhës në Mynih. "Uragani" Bajern përpin Mavraj & Co, duke ofruar një spektakël mbinatyror në tempullin e futbollit bavarez. Kjo ka qenë një humbje fotokopje dhe rekord në historinë e Hamburgut ashtu si ajo e dy viteve më parë, kur u mundën me të njëjtin rezultat në "Allianz- Arena" ( 0- 3 HT; 0-8 FT). Në 7 ndeshjet e fundit në shtëpi Bajerni i ka shënuar 44 gola (8:0, 5:0, 8:0, 3: 1, 9: 2, 5: 0, 6: 0) duke e shokuar ekipin verior dhe e shndërruar në tabelë qitjeje portën e tyre. Vidal shkakton dridhjen e parë ( 17') të tërmetit 8 ballësh dhe më pas tronditja vazhdon me tri dridhjet e Levandovskit (24', 42', 54'), golin e Alabës (56'), dopietën e Komanit (65', 69') dhe Robeni i bën hi në fund ( 87'). Suksesi 8- 0 ka qenë edhe një dhuratë mjaft e këndshme për Karlo Ançelotin, për të cilin ishte ndeshja e 1000-të si trajner në 22 vite karrierë. Jubile ka festuar edhe Manuel Nojer, për të cilin ishte ndeshja e 100-të në Bundesligë pa pësuar gol. Hamburgu shthuret, Bajerni e shkërmoq
Në mungesë të Alonsos, Tiago dhe Vidal formojnë dopiogjashtën difensive në mesfushë, ndërsa Myler pozicionohet prapa Levandovskit në rolin 10 në sistemin 42- 3- 1. Ai shkëlqen duke dhënë dy asiste dhe fituar një penallti. Riberi grumbullohet, por qëndron në stol. Ndërsa qendërmbrojtësi shqiptar i Hamburgut, Mërgim Mavraj, e nis nga minuta e parë. Hamburgu e starton me guxim ndeshjen, aq sa deri në minutën e 17-të raporti i gjuajtjeve në portë ishte 0-2 për ta. Por në minutat e mbetura çekuilibrohen. Vendësit marrin stafetën dhe Vidal shënon golin e avantazhit nga 16 metra. Një minutë më pas, Levën e ndal traversa. Ndërsa në minutën e 24- t,
Lahm nga e djathta pason te Myler, por sulmuesi bavarez pengohet nga Mavraj dhe gjyqtari Dankert me të drejtë akordon penallti. Levandovski gjuan dhe shënon golin e dytë. Më pas Levandovski humb dy shanse me kokë (29', 33'), por e finalizon në minutën e 42-të, duke përfituar nga rrëmuja dhe shkujdesja e mbrojtjes.
Roben "deh" Mavrajn dhe vulos 8-0
Hamburgu e nis sërish
mirë pjesën e dytë, ku Sakai (46') dhe Gregoriç (50') rrezikojnë portën e Nojerit. Më pas tifozët shohin festivalin e golave dhe shthurjen e dytë të ekipit mik. Adler i pret gjuajtjen Robenit ( 52'), por Levandovski (54') dhe Alaba çojnë në 5-0 rezultatin për dy minuta. Është hera e 36-të që Levandovski shënon më shumë se dy gola në një ndeshje të Bundesligës. Vetëm legjendat si Gerd Myler, Jup Hajnkes, Manfred Burgsmyler dhe Klaus Fisher kanë shënuar më shumë sesa polaku. Leva çon në 19 kuotën e golave këtë sezon në kampionat. Ançeloti freskon formacionin me Sançes, Koman dhe Rafinja. Bajerni nuk ndiente ngopje. Ylli francez Koman shënon dopietë për 4 minuta (65', 69'). Ndërsa në minutën e 87- të, Roben driblon lehtësisht Mavrajn dhe vulos 8-0. Të mërkurën Bajerni pret në shtëpi Shalken në çerekfinalen e Kupës.