Kamza drejt elitës, mund Ilirinë dhe... baltën
Luhet në një fushë patatesh, Rezi vendos sfidën
Kamza bën detyrat e shtëpisë dhe merr fitoren e 15- të të këtij kampionati. Ekipi është rikthyer të luajë në stadiumin e vet në një fushë që ngjante si moçal me baltë dhe pellgje uji. Një terren shumë i vështirë, që ka penguar lojtarët në lojë. Sfida është vendosur nga goli i vetëm i Rezit në minutën e 30-të.
Ndeshja
Që në minutën e 13-të vjen kërcënimi i parë në portën mike, ku Boci kroson dhe portieri me vështirësi e nxjerr në korner. Megjithatë, kamzalinjtë e zhbllokojnë shpejt rezultatin. Mehmeti shërben për Rezin, që godet menjëherë në ajër në zonë dhe 10. Goli ka sjellë qetësi te kamzalinjtë që sulmojnë vazhdimisht, por nuk finalizojnë siç duhet. Në fraksionin e dytë, skuadra e Ilirisë luan bukur duke balancuar lojën, por krijon edhe raste për shënim. Kështu, në të 47-ën është Bardhi që lëshon një predhë nga 25 metra, që detyron portierin Lamellari të kryejë një pritje të bukur. Në të 53-ën është Elmazi që godet fuqishëm nga 20 metra, por topi kalon ngjitur me shtyllën pingule. Në të 58-ën, Enco Malindi shkund këpucët nga balta me një gjuajtje mjaft të bukur, por pret portieri Baku. Në të 63- ën, fushë-krujasit kanë rastin më të pastër për të barazuar, kur Obejes del i vetëm me portierin kamzali, por nuk ia del të shënojë. Në të 80-ën ka një dëmtim të mbrojtësit të Kamzës, Ali Boci, që del përkohësisht me barelë dhe rifutet pas dy minutash në kohën kur Kamza kishte bërë të tria zëvendësimet. Në të 87- ën, Çekiçi me pak kujdes mund të dyfishonte. Me këtë episod merr fund dhe kjo sfidë, ku
Kamza nuk di të ndalet. Skuadra e drejtuar nga Bledar Devolli ka thelluar diferencën me 12 pikë nga Erzeni i vendit të dytë dhe 13 nga Besëlidhja e vendit të tretë, që do të luajë nesër ndeshjen e saj ndaj Burrelit. Kamzalinjtë kanë bërë një superkampionat
deri tani dhe janë pretendentët kryesorë për t'u ngjitur në Superiore. Edhe pse do të përgjysmohen pikët në fazën e tretë, diferenca që ka krijuar Kamza i bën shumë optimistë drejtuesit se do të jetë pikërisht kjo skuadër që do të rikthehet në elitë.