Montela: Fitojmë për Berluskonin, arbitrat më kanë borxhe

Fitorja kundër Fiorentinës ka rritur besimin në shtëpinë e Milanit për kualifikimin e skuadrës në kompeticionet europiane. Mirëpo, për të konkretizuar me sukses këtë objektiv është e nevojshme që kuqezinjtë të fitojmë sot përballë Sasuolos, që në "Mapei" nuk numëron asnjë humbje kundër "Djallit". Në vigjilje të sfidës, Montela tha: "Kur fiton ndihesh mirë, pasi në fund vetëm rezultati është i rëndësishëm. Sasuolo është një kundërshtar kompakt, që ka dëshmuar se mund të fitojë përballë çdo skuadre dhe Milani këtë gjë e di shumë mirë. Duhet të bëjmë kujdes te Berardi, i cili është shumë i aftë për të gjetur golin. Mirëpo, edhe ne kemi treguar se sivjet mund të mposhtim çdo ekip". Klubi po bëhet gati për një ndryshim epokal, por nuk është e programuar asnjë festë për ndeshjen e fundit të Silvio Berluskonit në krye: "Momenti që më ka emocionuar më shumë ka qenë firma e kontratës si trajner i Milanit. Ia kam thënë shpeshherë edhe Galianit, që ai, së bashku me presidentin, kanë kurorëzuar ëndrrën time të madhe dhe do t'i falënderoj gjithmonë. Sakaq, dua të them se nuk kam asnjë peng për sa i përket marrëdhënies sime me Silvio Berluskonin, pasi jam i bindur që kam dhënë gjithçka. Kam folur me presidentin pas fitores kundër Fiorentinës, që ia dedikova atij, ndërsa bashkëpunoj çdo ditë me Galianin, i cili i qëndron shumë pranë Milanit. E ardhmja? Nuk jam i shqetësuar, pasi përqendrohem çdo ditë te puna ime dhe jam i bindur që do të qëndroj për shumë kohë në drejtimin e Milanit". Në fund Montela u ndal në disa tema: "Në ndeshjen e parë, kundër Sasuolos, gjyqtari vërshëlleu një penallti bujare në favorin tonë, mirëpo unë nuk kam folur kurrë për arbitrin, edhe kur ata kanë marrë vendime të padrejta ndaj skuadrës sime. I pranoj vendimet e gjyqtarëve dhe nuk i komentoj kurrë, këtë e thotë trajneri i Milanit, që ndihet pak "borxhli" me gjyqtarët. Bonuçi-Alegri? Shembulli duhet të vijë në momentin më të vështirë dhe mendoj se Masimiliano ka vepruar drejt".