Kualifikimi i Skënderbeut rrit koeficientin në UEFA
Kualifikimi i Skënderbeut për në turin e tretë kualifikues të Ligës së Europës pas suksesit 3-1 me rezultat të përgjithshëm ndaj Kairat Almatit, ka ndikuar edhe në koeficientin e Shqipërisë në renditjen e UEFA-s për kampionatet e 55 shteteve europiane. Pas rënies së përkohshme në renditjen e përgjithshme, që vlen për sezonin e ardhshëm 2017-2018, si pasojë e rezultateve jo të mira të arritura nga klubet shqiptare në turin e parë kualifikues dhe në ndeshjet e para të turit të dytë, tashmë Shqipëria është rikthyer në vendin e 36-të, aty ku e nisi këtë sezon futbollistik. Fitorja e Skënderbeut ndaj Kairatit, kualifikimi për në turin e tretë, por gjithashtu edhe triumfi i Kukësit ndaj Sherifit, pavarësisht eliminimit, bënë që Shqipëria të fitojë 2 vende në renditjen e projektuar për sezonin e ardhshëm, duke qenë se pas ndeshjeve të para të turit të dytë koeficienti i grumbulluar mundësonte renditjen në vendin e 38-të. Ndërkohë, sa i përket koeficientit të grumbulluar vetëm për këtë sezon, Shqipëria ka bërë një rritje mjaft të madhe, duke u ngjitur nga vendi i 40-të në atë të 29-të. Megjithatë, kjo rritje momentale vjen si pasojë e eliminimit të të gjitha skuadrave të shumë shteteve të tjera nga garat europiane dhe gjithashtu prej faktit që klubet e disa shteteve të mëdhenj nuk e kanë nisur akoma garimin. Për momentin, Shqipëria ka lënë pas kampionatet e vendeve fqinje si Maqedonia dhe Mal i Zi. Gjithashtu, kampionati ynë ka një koeficient më të lartë se ai i Finlandës, Bosnjës apo Irlandës.