Demi i refuzon të gjithë, do Besëlidhjen

Portieri ka pasur disa oferta, por do të vazhdojë kontratën me lezhjanët

Skuadra lezhjane është me pushime, të cilat, sipas të gjitha gjasave, do të vazhdojnë deri në fund të këtij muaji. Megjithatë, drejtuesit janë të qetë, pasi shumica e lojtarëve që mbyllën sezonin janë nën kontratë dhe presin një telefonatë nga klubi që të nisin përgatitjet. Një prej këtyre futbollistëve është portieri Elson Demi, i cili, prej një sezoni e gjysmë, është pjesë e ekipit. Ndonëse lojtari ka pasur disa oferta, në një prononcim për "Panorama Sport" është shprehur se do të vazhdojë të mbrojë portën lezhjane nëse një gjë e tillë i kërkohet. "Aktualisht jam me pushime, por një futbollist profesionist nuk njeh pushime totale, ndaj çdo ditë stërvitem individualisht për të ruajtur formën fizike dhe të jem gati në momentin që do të nisin përgatitjet", tha portieri, i cili flet edhe për të ardhmen. "Sa për oferta, ato nuk më kanë munguar, madje kam pasur disa tunduese, jo vetëm brenda vendit, por edhe jashtë, konkretisht nga vendet fqinje, gjithsesi ende nuk kam vendosur, pasi jam në kontakte të vazhdueshme me klubin. Besëlidhja është skuadra e zemrës sime dhe jam i gatshëm që t'u përgjigjem ftesave të saj sa herë të ketë nevojë, për këtë jam i vendosur. Besoj se Besëlidhja e sezonit të ri do ta përmbushë misionin e saj për t'u rikthyer në elitë, pasi tifozëria dhe drejtuesit kanë pritur 10 vite për një gjë të tillë", ka mbyllur Demi. Preng Gjikola