Gilman Lika, drejt "gradimit" kapiten te Vllaznia

Pas largimit të Ndriçim Shtubinës te skuadra e Kukësit, posti i kapitenit te skuadra e Vllaznisë mbeti pezull dhe stafi teknik pritet që ta zëvendësojë. Në ndeshjet miqësore shiritin e kanë mbajtur disa futbollistë të ndryshëm, ndërsa në takimin e fundit ndaj Tërbunit ishte Gilman Lika që mbajti këtë post. Mësohet se mesfushori shkodran, që u rikthye te Vllaznia pas një kohe të gjatë, do të mbajë pozicionin e kapitenit në skuadër gjatë gjithë sezonit të ardhshëm futbollistik. Një gjë e tillë nuk është konfirmuar ende, duke qenë se momentalisht të gjithë janë të përqendruar në ndërtimin e skuadrës dhe fazës përgatitore. Gjithsesi, tashmë në Shkodër të gjithë po shohin 30-vjeçarin si pasuesin e Shtubinës, duke parë edhe eksperiencën e madhe që ai ka brenda dhe jashtë vendit. Lika parashikohet të jetë një nga titullarët e formacionit të trajnerit Cungu në sezonin e ri futbollistik. Vllaznia e sezonit të ardhshëm është e bazuar kryesisht te lojtarët vendës dhe ka rikthyer disa prej tyre në ekip. Emri i radhës që pritet t'i bashkohet skuadrës së drejtuar nga Cungu është ai i Erjon Vucajt, mesfushori që luajti sezonin e fundit te Laçi.