Hejnkes i thur elozhe Mylerit dhe Robenit
"Holandezi fluturues", Arjen Roben, i ka dhënë fund karrierës së tij me fanellën e kombëtares disa ditë më parë, në fund të sfidës me Suedinë, e vlefshme për kualifikimin në Kupën e Botës. Edhe pse kombëtarja holandeze nuk ka mundur të kualifikohet, trajneri i ri i skuadrës së kampionëve gjermanë, Jup Hejnkes, ka folur me superlativa për Roben. Gjatë një deklarate në ceremoninë e shpërndarjes së automjeteve të reja nga "Audi", Hejnkes e ka krahasuar Arjen Roben me disa prej legjendave holandeze si, Johan Krojf dhe Rud Gulit, duke thënë se: "Holanda ka prodhuar vazhdimisht lojtarë të jashtëzakonshëm si, Johan Krojf, Rud Gulit, Van Basten dhe Rijkard. Ndaj, mendoj se edhe Arjen Roben i përket së njëjtës kategori yjesh. Ai është një lojtar i çmuar i kombëtares holandeze dhe do të mbetet gjithnjë i tillë. Roben është një profesionist i rrallë, sidomos në botën e futbollit të ditëve të sotme. Një lojtar me motivimin e Roben, është vështirë të gjendet në ditët e sotme, ja pse mendoj se Arjen Roben mund të vazhdojë të luajë në nivelin e një ylli profesionist si në këtë sezon, ashtu edhe në tjetrin." Mesfushori holandez, Arjen Roben, ka një kontratë me skuadrën e kampionëve gjermanë deri në fundin e sezonit aktual, ndaj duke vlerësuar tonet e larta të trajnerit Hejnkes, pritet edhe një rinovim i mundshëm në përfundimin e sezonit aktual. Përpos yllit holandez, trajneri dhe njëkohësisht legjenda e skuadrës së Bajernit, Jup Hejnkes, nuk ka harruar të ndajë opinionin e tij lidhur me zëvendëskapitenin e bavarezëve, Tomas Myler duke e cilësuar atë si një lojtar tepër të madh. Legjenda gjermane, madje nuk është aspak i habitur se si Tomas Myler është shndërruar në një prej ikonave të klubit të Bajernit, duke thënë se: "Myler është një lojtar i një kalibri tepër të lartë. Ai është kthyer në ikonën e skuadrës bavareze, gjë e cila pritej, pasi është një lojtar me intelekt dhe ka dhënë gjithmonë maksimumin si një lider i skuadrës, duke e ndihmuar atë në çdo situatë. Që prej rikthimit tim të katërt në skuadrën e Bajernit, mendoj se Myler ka një peshë tepër të madhe mbi supe, pasi tani ai është edhe lideri i skuadrës në fushën e blertë, në mungesë edhe të Manuel Nojer. Më vjen mjaft mirë që ai është kthyer në një faktor tepër të rëndësishëm të kësaj skuadre dhe gjithmonë është aty për të." Hejnkes ka folur edhe mbi stërvitjen, ku sipas tij, Myler ka shfaqur një paraqitje të jashtëzakonshme duke thënë: "Në seancat stërvitore, Myler ia ka dalë mbanë më së miri dhe ka treguar një paraqitje tepër mbresëlënëse. Ai tregon gjithmonë se është i motivuar dhe i gatshëm për të marrë maksimumin nga seancat stërvitore. Lojtarë të tillë i duhen skuadrës bavareze."