Preiti kthehet pranë ekipit

Drejtori sportiv i Partizanit, Antonelo Preiti, zakonisht ndjek çdo seancë stërvitore të ekipit. Por, në ditët e fundit është vënë re mosprania e tij në stërvitje, kohë e cila përkon me përgatitjet që po kryen Partizani nën drejtimin e trajnerit të ri, Sulejman Starova. Mungesa e tij vuri shumë pikëpyetje mbi të ardhmen e italianit, pasi ai shikohet si i pari që mund të pasojë gjurmët e dyshes së trajnerëve të larguar, Iuliano-Dosena. Gjithsesi, dje Preiti ka qenë pranë ekipit në Kamzë, ku për "Panorama Sport" ka sqaruar edhe mungesën e tij. "Më kanë thënë se jeni 'shqetësuar' për mungesën time. Nuk po na lini që të vizitojmë as familjen në periudha ndërprerjesh, pasi menjëherë nisin aludimet (qesh). Ja ku jam! Meqë nuk kishte aktivitet në fundjavë, vizitova familjen time në Itali dhe tani jam pranë ekipit", u shpreh Antonelo Preiti.