Milinkoviç fsheh formacionin, Shtubina e nis nga fillimi

Ekipi i Kukësit ka udhëtuar gjatë paradites së djeshme nga Tirana drejt Kukësit. Pas akomodimit në hotel dhe konsumimit të drekës, trajneri Milinkoviç e ka nxjerrë ekipin në stërvitje. Specifikë në këtë seancë ka qenë se Milinkoviç nuk e ka ndarë njëmbëdhjetëshen titullare pasi ka shkartisur ekipin, për shkak të frikës së zbulimit të formacionit. 49-vjeçari duke ditur rëndësinë e këtij takimi në lidhje me garën për titull, por dhe për ecurinë e Kukësit dhe të fatit të tij, e ka mbajtur të fshehtë formacionin. Gazeta mëson se trajneri do të rikthejë në formacion ndaj Partizanit mbrojtësin Albi Alla dhe mesfushorin Besar Musolli. Porta do të mbrohet nga Enea Koliçi, mbrojtja do përbëhet nga kapiteni Hallaçi në të djathtë, Shameti e Alla në qendër, Rrumbullaku në të majtë. Nga mesfusha Milinkoviç ka kërkuar shumë. Dilema është se kush do të luaj në të djathtë, Shtubina apo Ethemi. Gjasat janë që Shtubina të luajë në të djathtë, Musolli e Krokotiç në qendër dhe Kale në të majtë. Ethemi pritet të luajë mbas Gurit që është pika referuese në sulm.