Elbasani ruan kreun, vendosin të rinjtë

Miqtë janë inekzistentë, Kotorri bën spektatorin

Elbasani koleksionon fitoren e radhës në sh tëpi, ku ka likuiduar në shifrat 2-0 Delvinën. Golat e dy futbollistëve të moshave, Enis Dishanit në pjesën e parë dhe Arsen Lleshit në të dytën, u dhuruan tri pikët që i mbajnë ende në krye elbasanasit. Ishte një ndeshje e dominuar totalisht nga vendësit, me Kotorrin që përgjatë 90 minutave ishte në rolin e spektatorit. NDESHJA

Që në startimin e sfidës elbasanasit duken më superiorë dhe kontrollojnë lojën, duke krijuar edhe raste të rrezikshme në portën kundërshtare. Inkursionet e Hyshmerit nga krahët nuk shfrytëzohen si duhet nga futbollistët vendas, me Toçkën që në një prej rasteve godet edhe traversën. Pavarësisht golit që nuk po dukej në horizont, verdheblutë krijojnë shumë raste dhe ishte çështje minutash zhbllokimi i sfidës. Në të 32-ën Hyshmeri kroson nga këndorja, kërcen më lart nga të gjithë Dishani dhe sfera ndalet në rrjetë. 1-0 dhe me këto shifra mbyllet edhe pjesa e parë. Fraksioni i dytë i lojës nis ashtu si i pari, me Elbasanin që kontrollon dhe dominon. Sërish Hyshmeri futet në zonë nga e majta, jep një asist për Arsen Lleshin, i cili, me një goditje shtrirazi, mposht portierin mik në minutën e 48-të. 2- 0 dhe praktikisht gjithçka duket e mbyllur.