Firmë me Bitrin, Partizani nis përforcimet

Qendërmbrojtësi 21-vjeçar i Tomorit, akord trevjeçar me klubin e kuq

Në një kohë që sezonit futbollistik po i vjen fundi, te skuadra e Partizanit kanë nisur edhe lëvizjet e para në merkato. Mësohet se klubi i kuq është përforcuar ditët e fundit me një futbollist që vjen nga Kategoria e Parë dhe më konkretisht nga skuadra e Tomorit. Enea Bitri, qendërmbrojtësi 21-vjeçar që është prodhim i akademisë beratase dhe ka luajtur në karrierën e tij vetëm me Tomorin, ka bindur drejtuesit e kuq, të cilët i kanë ofruar një kontratë trevjeçare, nga e cila do të përfitojë rreth 15 mijë euro në sezon. Megjithatë, Bitri nuk ka nisur menjëherë seancat stërvitore me të kuqtë, pasi një gjë të tillë do ta bëjë menjëherë pasi ekipi të nisë përgatitjet për sezonin e ri ose për pjesëmarrjen në Europë, gjithmonë nëse arrin të sigurojë një vend. Klubi kryeqytetas nuk ka pritur konfirmimin për trajnerin e sezonit të ardhshëm, ku sipas të gjitha gjasave kroati Mario Tokiç do të marrë drejtimin, por ka nisur të hedhë firmat mbi kontratë. Pas dështimit në objektiva në kampionatin që sapo u mbyll, te të kuqtë pritet të ketë një revolucion sa u takon afrimeve dhe largimeve, por gjithçka do të vendoset nga trajneri që do të vazhdojë punën në krye të skuadrës. Të kuqtë do të ndërtojnë një skuadër që kampionatin e ri të rivalizojë për titullin kampion.