Daliç: Këta lojtarë janë të çmendur, duam trofeun
“Doja të kryeja zëvendësime, por askush s’pranonte të dilte”
llatko Daliç e shkroi historinë e tij. Do ta kishte shkruar gjithsesi, edhe nëse Kroacia mos t'ia kishte dalë kundër Anglisë. Të shumë ishin skeptikët për 51-vjeçarin për shkak të mungesës së përvojës për të drejtuar kombëtaren në një kompeticion të tillë. Përveç disa kupave të fituara në Arabi me Al-Hilal dhe Al-Ain, i vetmi trofe që Daliç ka ngritur me të vërtetë në Europë është ai i Superkupës së Shqipërisë me Dinamon (2008-'09). Dhe në qiellin e Moskës, në datë 15, do të ketë shansin të ngrejë edhe trofeun e dytë si trajner, sërish në mes të kontinentit. Por a do të kërkojë Daliç hakmarrje për atë humbje që i shkaktoi Franca në gjysmëfinalen e parë të kroatëve 20 vite më parë? "Në 1998-ën, unë isha në Francë për të ndjekur tri ndeshjet e para si tifoz. Të gjithë në Kroaci kujtojnë në atë ndeshje kur Turam shënoi dhe ne humbëm 2-1. Ka qenë temë diskutimi e 20 viteve të fundit. Më kujtohet kur festuam golin e Shukerit, por sapo rinisi loja, ata barazuan. Si Franca, ashtu edhe Kroacia, i kanë treguar cilësitë e tyre. Ne
nuk kërkojmë hakmarrje. Ky është futbolli. Ky është sport, por ajo që ne duhet të bëjmë është të jemi të përqendruar dhe të luajmë ndeshjen tonë më të mirë të turneut", tha trajneri kroat, i cili i rikthehet më pas ndeshjes kundër Anglisë dhe vlerëson heronjtë e tij:
"Ajo që lojtarët tanë bënë sot, forca që ata treguan, qëndresa, niveli i energjive është e jashtëzakonshme. Unë doja të kryeja zëvendësime, por askush nuk donte të dilte nga fusha. Të gjithë më thoshin: 'Jam gati, mund të vrapoj ende'. Disa lojtarë luajtën të dëmtuar (Rebiç+Vrsaljko), gjë që nuk do të kishte ndodhur po të ishte një tjetër ndeshje. Dy lojtarë luajtën me gjysmë këmbe, por nuk u vu re. Askush nuk donte që të dorëzohej kur unë po bëja formacionin, askush nuk tha se nuk ishte gati në shtesë, askush nuk donte të ndërrohej dhe kjo tregon karakterin dhe më bën shumë krenar. Askush nuk u dorëzua".
HISTORIKE - "Dua të uroj djemtë dhe t'u them: Ata nuk janë normalë. Fantazia me të cilën luajtën, mënyrën sesi vrapuan, sesi luftuan, kjo ishte historike. Të dielën do të luajmë për titullin kampion. Falë tifozëve tanë, ne nuk e kemi thënë ende fjalën e fundit. Do të jemi kampionë bote nëse Zoti do", shtoi Daliç. Trajneri u pyet edhe për atmosferën e çmendur në Kroaci: "Jam i sigurt se vendi po çmendet. Skuadra po humbte, por djemtë u rikthyen". Dhe në fund edhe një batutë për këmishën e tij të bardhë, për të cilën thotë se i sjell fat dhe nuk ka ndërmend ta ndërrojë as në finale, edhe pse dje iu bë pis nga festimet me lojtarët: "Këmisha ime e bardhë më sjell fat. Le të jetë e zhubrosur dhe e pistë. Por unë nuk do ta ndryshoj atë. Në finale do të jem sërish me të në fushë".