Devolli: Djemtë janë heronj, mos e quani rastësi fitoren
Bledar Devolli gjithmonë ka qenë një nga ata që në fushë nuk pushonte së vrapuari. I tillë ka mbetur edhe si trajner. Debutimin në Superiore e nis me një fitore dhe nuk ka më mirë se kaq. Vetë trajneri në fund të takimit tregoi se fitorja nuk erdhi rastësisht. "Nuk është e rastësishme fitorja jonë. Jam i lumtur për këto tri pikë, që shumë nuk i kishin menduar. Edhe pse kishim Tiranën përballë e dinim që ata vinin nga Kategoria e Parë dhe kishin lojtarë të rinj. Na kanë vënë në vështirësi dhe i kemi vënë në vështirësi. Kemi bërë një punë të gjatë. Dua të falënderoj futbollistët. Janë heronj të vërtetë. Kam një grup të mrekullueshëm në duar. Sakrifikojmë të gjithë. Që nga lojtari i 22të deri tek unë. Do shkojmë çdo ndeshje për maksimumin", u shpreh ish-mesfushori, i cili premton të tjera gjëra të mëdha. Sipas tij, tifozët nuk kanë parë Kamzën e plotë dhe kjo skuadër mund të shkojë larg. "I vetmi peng është se futbollistët na kanë ardhur me vonesë dhe nja dy nuk kanë ardhur akoma. Jam shumë i kënaqur me këta që kam. Në qoftë se i bën hyzmetin stërvitjes vjen dhe rezultati. Duhet me
këmbë në tokë. Pa harmoninë e grupit nuk vijnë rezultatet", vijoi më tej Devolli.
Por a besonte te fitorja Devolli dhe grupi i lojtarëve? "Nuk kam thënë jam i kënaqur për barazim. Kam thënë që do shkojmë në çdo ndeshje për 3 pikë. Në çdo stërvitje unë kërkoj grintë dhe agresivitet. Nuk është i rastësishëm ky rezultat. Vuajtëm,
pasi kishim një ekip të madh. Falënderoj edhe Zotin për këtë fitore, por edhe çunat që janë heronj, sepse asgjë nuk të vjen nga larg", pranon trajneri i Kamzës. Diferencat mes ekipeve në Superiore janë të vogla dhe Kamza mund të jetë sërish surpriza e sezonit. Devolli thotë se të gjithë duhet të durojnë. "I kam thënë dhe presidentit. Duhet të kemi vetëm durim. Futbolli varet si të merr. E rëndësishme është të kemi durim. Kemi ndërtuar një ekip me merak. Harmonia ka notën 10. Rezultatet do vijnë. Ne i bëjmë hyzmetin. Kjo do jetë gjithmonë motoja jonë. Do të festojmë, por më pas menjëherë do të nisim punën për Partizanin", mbylli trajneri i Kamzës, Bledar Devolli.