Napoli bën detyrën, tjetër fitore me Zyrihun

Hysaj, i vetmi shqiptar në turne

Gjithçka shkoi sipas “skenarit”: Napoli kalon Zyrihun e shumë kosovarëve dhe kualifikohet në fazën e 1/8-ave të Ligës së Europës. Asnjë surprizë në stadiumin “San Paolo”, ku skuadra e Karlo Ançelotit fiton 2-0, pas suksesit 3-1 në Zvicër që detyronte miqtë të tentonin të pamundurën. Në ndeshjen e kthimit të 1/16-ave për italianët vendosin golat e Simone Verdit dhe Ounas, në fundet e secilës pjesë, por mbi të gjitha, pas rezultateve të djeshme, Elseid Hysaj, titullar dhe për 90 minuta në fushë, mbetet shqiptari i vetëm protagonist në Ligën e Europës. NGA NJË GOL PËR PJESË - Një paraqitje e mirë ajo e ekipit “axurr”, me shumë aksione të krijuara, pavarësisht rrotacionit në 11shen fillestare: në mbrojtje u rikthye Çiriçes (për debutimin sezonal pas dëmtimit në ligamentin e gjurit) dhe Kulibali, të ndihmuar në krahë nga Hysaj dhe Ghulam. Në mesfushë nga 1’ Zielinski, por edhe më pak “të përdorurit” Verdi, Ouna dhe Diavara. Ndërsa dyshja sulmuese ishte e formuar nga Insinje dhe Mertens, të rrezikshëm që prej çasteve të para të sfidës, pavarësisht shumë shanseve të shpërdoruara përpara avantazhit të regjistruar nga Verdi (43’) që “çliroi” edhe Ançelotin në stol. Rastin e parë (dhe të vetëm) Zyrihu e ka në fillimin e pjesës së dytë: një goditje fluturimthi e Khelifit, që për pak nuk vendos në rrezik kualifikimin e napolitanëve. Në të 75ën, Ouna dyfishon shifrat: Mertens gjen në mënyrë perfekte spanjollin, i cili mbyll llogaritë. Në fragmentet e fundit nuk ka thuajse asgjë për t’u shënuar. Sot pritet shorti i 1/ 8-ave, në Nion: Napoli shihet pa dyshim si një nga kandidatet kryesore për fitoren e trofeut.