Tjetër provokim i Vandës: Largohu kur nuk të vlerësojnë
Bashkëshortja-menaxhere nuk ndalet me postimet
Gjatë paradites së të mërkurës, nga testet mjekësore në klinikën “Humanitas” të Milanos, të kërkuara nga vetë Interi, është konfirmuar se shqetësimet në gju, që momentalisht nuk po lejojnë Mauro Ikardin të luajë, “nuk kanë pasur ndryshime të mëdha krahasuar me kontrollet e kryera përpara startit të sezonit sportiv aktual”. Në mbrëmje, një postim i Vanda Narës në “Tëitter”, që duket gjithmonë i lidhur me çështjen, nuk ka ndihmuar aspak në riafrimin mes sulmuesit zikaltër dhe klubit. “Injoro kur të kritikojnë, dëgjo kur të japin këshilla, largohu kur nuk të vlerësojnë”, shkruhej në foton ku bashkëshortja-menaxhere e argjentinasit uronte “natën e mirë”. Ndërsa mesazhit të një tifozi, ku lexohej “ne të duam, ju lutem qëndroni tek Interi sepse jeni një pjesë e zemrës sime”, i ka replikuar me një zemër të thyer... Dhe pavarësisht thumbimit të radhës, mbrëmjen e djeshme, Vanda dhe Mauro Ikardi nuk munguan në “San Siro”, në fitoren 4-0 të Interit me Rapidin, por sërish u bënë shënjestër e vërshëllimave. KUNDËR TRAJNERIT – Sjellja e përsëritur e Vandës shkon tërësisht kundër me fjalët e trajnerit Luçiano Spaleti, i cili në konferencën për shtyp të asaj dite përpara Rapidit u shpreh se “këto situata nuk zgjidhen me mesazhe dhe ‘like’, por duke qëndruar të bashkuar”. Në krahun tjetër, Ikardi, i cili kaloi pasditen duke festuar datëlindjen e njërit prej fëmijëve të Vandës dhe mbrëmjen përpara televizorit duke parë Champions-in, nuk ishte i grumbulluar për sfidën me austriakët, për të tretën ndeshje radhazi.