Berat Gjimshiti: As unë e as Juvja s’jemi perfektë, Piontek më befasoi
Ndër parimet bazë të dialektikës është të parit në sy të personit që qëndron përballë. Të paktën kështu thuhet. Mbase është e vërtetë, e megjithatë nuk mund të vlejë për të gjithë. Të paktën jo për Berat Gjimshitin, gjiganti shqiptar me 190 centimetra që gjatë intervistës fiksohet me një pikë dhe nuk ia ndan sytë. Vështirë të të shohë në sy, por kjo nuk është arsye për të vënë në diskutim natyrë e djaloshit të lindur në Zyrih më 19 shkurt të 1993-shit. Karakter mbrojtësi që luan me Kombëtaren e Shqipërisë ka me shumicë. Fytyrë prej të forti dhe vendosmëri në fjalët e tij, teksa deklaron: “Jam i kënaqur me sezonin tim, qoftë në aspektin individual e ashtu në atë ekipor. Jam përpjekur çdo ditë të jap maksimumin. 100 për qind në çdo stërvitje. Që kur u bëra pjesë e grupit, u mundova të nxjerr në pah vlerat e mia dhe të tregoj me fakte që e meritoja fanellën e Atalantës”. Në verën e nxehtë të vitit të kaluar pakkush në Itali priste një surprizë të tillë nga Berati. Pak fjalë e shumë fakte. Vërtet shumë. Deri tani mbrojtësi shqiptar ka koleksionuar 12 prezenca në kampionat, të cilat janë “stolisur” me një asist dhe një gol. Ai gol më 11 nëntor të vitit të kaluar nuk ishte normal, sepse ndeshja nuk ishte e tillë e aq më pak rivali. Ndaj Interit, Gjimshiti zgjodhi takimin perfekt për të nënshkruar paktin e tij me tifozët e Atalantës. Pikërisht ndaj zikaltërve të Milanos, ai dhuroi edhe ndeshjen e tij më të mirë që kur ndodhet në Bergamo. BERATI DHE SULMUESIT – Në fakt, shqiptari nuk ka dhuruar vetëm një paraqitje të mirë. Përveç autogolit ndaj Juventusit, ai gjithnjë ka qenë në lartësinë e duhur. Edhe në sfidën e fundit kundër Milanit, pavarësisht se Atalanta pësoi tre gola. Elozhet për të erdhën edhe nga Kristof Piontek, teksa Gjimshiti i kthen favorin duke deklaruar: “Nuk e prisja që Pionteku të më paraprinte. Në raste të tilla 9 sulmues në 10 e stopojnë topin për të tentuar diçka në një moment të dytë. Ai goditi papritur dhe realizoi një kryevepër. Ajo ishte një goditje që nuk e bën dot kushdo. Është shumë i fortë, por të tillë janë edhe të tjerë si Ronaldo, Imobile dhe Ikardi. Nuk e zgjedh dot se kush është më i forti mes tyre”. EUROPA – Nëpërmjet Kupës së Italie ose Serisë A, misioni i Gjimshitit mbetet i njëjti. Ai kërkon pjesëmarrjen në Kupat e Europës në sezonin e ardhshëm dhe nëse Atalanta shënon shumë (51 gola) është po aq e vërtetë që pëson po aq. Berisha dhe Golini janë ndëshkuar 34 herë në 24 ndeshje, por Gjimshiti bën liderin duke deklaruar: “Ekipi ka 11 lojtarë dhe repartet nuk veçohen. Çdo gjë e bëjmë së bashku. Askush nuk është i përsosur, nuk është as Juventusi. Sekrete këtu nuk ka. Duhet punuar gjithnjë pa u kursyer. Unë e kam bërë dhe falënderoj trajnerin për besimin”. Raport fantastik ai i 25-vjeçari me teknikun zikaltër. Gasperini e vëzhgon imtësisht dhe e kupton menjëherë nëse jemi mirë ose jo. Unë jam i lumtur tek Atalanta dhe do të doja të qëndroja sa më gjatë”. Më këto fjalë e mbyll Gjimshiti, teksa sytë qëndrojnë të fiksuar tek e njëjta pikë.